अवर्षणग्रस्त परिसराचे पालटले रुपडे!

मेशी : वर्षानुवर्षे अवर्षणग्रस्त असलेल्या देवळ्याच्या पूर्व भागातील मेशी- डोंगरगाव रस्त्यालगतची विस्तीर्ण वनराई यंदा समाधानकारक पावसामुळे बहरली असून वनौषधींचे आगर म्हणून परिचित असलेल्या या परिसराचे यंदा रुपडे पालटल्याचे दिसून येत आहे. यावर्षी जून महिन्याच्या आरंभापासूनच चांगला पाऊस होत असल्याने नैसर्गिकरीत्या लाभलेले जंगल हिरवेगार झाले आहे. रस्त्याच्या दुतर्फा डोंगररांगासह सुमारे बाराशे हेक्टर क्षेत्रातील विस्तीर्ण वनराई पसरलेली आहे. या जंगलात विविध वनौषधी आहेत. परंतु गेल्या अनेक वर्षांपासून हा परिसर अवर्षणग्रस्त झालेला होता. त्यामुळे जंगलाचे संगोपन आणि संवर्धन फारशा प्रमाणात झालेले नव्हते. कारण पाण्याअभवी असंख्य झाडे, झुडपे वाळत चालली होती. वनविभागाने अथक परिश्रम घेऊनही जंगलाचा चेहरामोहरा फारसा बदलत नव्हता परंतु मागील वर्षीही चांगला पावसाळा होता आणि याहीवर्षी चांगला पाऊस होत असल्याने जंगल परिसर हिरव्या शालूने नटल्यासारखा दिसू लागला आहे. दरवर्षी समाधान पाऊस राहिल्यास ही वनराई पर्यटनस्थळ म्हणून नावारूपास येऊ शकते. आजही या जंगलात विविध वनौषधीबरोबरच अनेक प्रकारची जंगली श्वापदांचेही रहिवास आहे. मेशी, डोंगरगाव, खारीपाडा येथील वनकमिटी तसेच वनविभागानेही जंगल संवर्धनाची जागरूकता कायम ठेवण्याचे बोलले जात आहे.