कोरोनाकाळात अनेकांच्या नोकऱ्यांवर गंडांतर आले, तर बहुतांश नोकरदारवर्गाला वेतनकपातीचा सामना करावा लागत आहे. तसेच व्यावसायिकवर्गाचे लॉकडाऊन, निर्बंधांमुळे हाल होत आहेत. त्यांच्याही व्यवसायावर परिणाम झाला आहे. यामुळे कर्जाचे आमिष दाखवून त्याचा गैरफायदा घेत फसवणूक करणाऱ्या सायबर गुन्हेगारांचेही फावले आहे. अत्यंत कमी टक्क्यांत सहजरित्या कर्ज उपलब्ध असल्याचे भासवून विविध ॲप्लिकेशनच्या लिंक पाठवून ते ॲप्लिकेशन डाऊनलोड करण्यास भाग पाडले जाते. जेव्हा एखादी व्यक्ती या ॲप्लिकेशनच्या दिलेल्या लिंकवर क्लिक करते तेव्हा त्याच्या आर्थिक फसवणुकीचा मार्ग मोकळा होतो. कर्जसहाय्य करणाऱ्या विविध नामांकित कंपन्यांच्या नावानेसुध्दा गुगल - प्ले - स्टोअरवर बनावट ॲप्स उपलब्ध आहेत. यामुळे ॲप्लिकेशन डाऊनलोड करण्यापूर्वी खात्री करणे गरजेचे आहे.
--इन्फो--
ॲप डाऊनलोड करताच खात्यातील रक्कम गायब
१) समोरच्या व्यक्तीकडून मेसेज पाठवून मोबाईल ॲप्लिकेशन डाऊनलोड करण्यास भाग पाडले जाते. त्यामुळे अशा फसव्या लिंकपासूनदेखील सावध होणे गरजेचे आहे. जेव्हा लिंकवर क्लिक केले जाते तेव्हा त्या सायबर गुन्हेगाराला वैयक्तिक माहितीचा डेटा हॅक करण्याची संधी मिळते. काही समजण्याआधीच हॅकर्सकडून बँक खात्यातील रकमेवर डल्ला मारला जातो.
२) हॅकर्सला केवळ गोपनीय माहिती जाणून घ्यावयची असते. आजकाल तर आधारकार्ड क्रमांकदेखील बँक खात्याशी जोडलेला असतो. त्यामुळे हॅकर्सला फारसे अवघड होत नाही. एकदा का ॲप डाऊनलोड करण्याच्या लिंकवर क्लिक केले, की आपोआप हॅकर्सला आपण आपल्या बँक खात्याची माहिती चोरण्यासाठी जणू निमंत्रणच दिले असे समजावे.
---इन्फो---
या आमिषांपासून सावधान
वैयक्तिक कर्जाची रक्कम अवघ्या काही तासांत तुमच्या खात्यात मिळवा
वैयक्तिक कर्जापोटी आकारल्या जाणाऱ्या व्याजदराची टक्केवारी अत्यंत कमी
वैयक्तिक कर्जासाठी लागणारे प्रोसेसिंग शुल्क न भरता मिळवा कर्जाची पूर्ण रक्कम तुमच्या बँक खात्यात.
कुठलेही कागदपत्रे न देता तत्काळ कर्ज मंजूर करून घ्या आणि हप्ते फेडण्याच्या सुलभ प्रक्रियेचा लाभ मिळवा.
---इन्फो--
सावधान....! तुमचीही होऊ शकते अशीच फसवणूक
अलीकडेच आर्टीलरी सेंटरमधील एका जवानाला आर्थिकदृष्ट्या पैशांची गरज भासली असता त्या जवानाने कमी व्याजदरात अधिक कर्ज देणाऱ्या मेसेजला व भ्रमणध्वनी कॉल आणि व्हॉट्सॲपवरील संवादाला भुलून अनोळखी व्यक्तीवर विश्वास दाखविला असता सुमारे दीड लाखांच्या फसवणुकीचा सामना त्याला करावा लागला. सायबर चोरट्यांनी यासाठी कर्जसहाय्य करणाऱ्या नामांकित फायनान्स कंपनीच्या नावाचा वापर केला. त्या जवानाची वेगवेगळ्या प्रकारे दिशाभूल करत वेळोवेळी ऑनलाईन डिजिटल बँकिंग ॲपद्वारे पैसे उकळले.
--इन्फो--
...ही घ्या काळजी :
१) कर्जसहाय्य देण्याचा आलेला मेसेज अथवा व्हॅल्युबल कस्टमर म्हणून मंजुळ आवाजात संपर्क साधणाऱ्या सायबर चोरट्यांपासून सावध रहा.
२) कमी टक्क्यांत एक लाख किंवा दोन लाखांपर्यंत कर्ज मंजूर करून देत असल्याचे कॉल आल्यास त्यांना प्रतिसाद देऊ नका किंवा त्यांच्याशी आपल्या मातृभाषेतच संवाद साधा, त्यांची जी भाषा असेल त्या भाषेत बोलू नका.
३) मोबाईलवर आलेल्या मेसेजमधील किंवा ई-मेलद्वार प्राप्त झालेल्या अशा कुठल्याही ॲप्लिकेशनच्या लिंकवर थेट क्लिक करू नका, ॲप्लिकेशन डाऊनलोड करताना सरसकट मोबाईल गॅलरी, व्हिडिओ, ऑडियो, कॅमेरा अशा सर्व परवानग्या स्वत:हून ‘ओके’ करू नका.
250721\25nsk_8_25072021_13.jpg
कर्ज घ्या