सिन्नर नगरपरिषदेकडून डिजिटल पेमेंट सुविधा

सिन्नर : नगरपरिषदेचे कर भरण्यासाठी डीजिटल पेमेंट सुविधा सुरू केली आहे. सदर सुविधा देणारी सिन्नर नगर परिषद ही पहिली नगर परिषद ठरली आहे.

नागरिकांना आता घर बसल्या डेबिट व क्रेडीट कार्डद्वारे कराचा भरणा करता येणार असल्याची माहिती मुख्याधिकारी व्यंकटेश दुर्वास, करनिरीक्षक नितीन परदेशी यांनी दिली. सिन्नर नगरपरिषदेद्वारे घरपट्टी-पाणीपट्टी वसुलीबाबत विशेष मोहिम राबविण्यात येत आहे. त्यानुसार ३१ मार्च २०१९ अखेर १०० टक्के घरपट्टी-पाणीपट्टी वसुली करण्याचे उद्दीष्टे ठेवण्यात आले आहे. नागरिकांच्या सोयीसाठी नागरिकांनी आपल्या डेबिट कार्ड / क्रेडिट कार्डद्वारे डीजिटल पेमेंट करता यावे, याकरीता सिन्नर नगरपरिषदेद्वारे डीजिटल पेमेंट सुविधा तयार करण्यात आली आहे. सिन्नर नगरपरिषद कार्यक्षेत्रात वास्तव्य करणाऱ्या नागरिकांना घरपट्टी-पाणीपट्टी धारकांनी या सुविधेचा वापर करावा तसेच घरपट्टी-पाणीपट्टी, गाळा भाडे वसुली मोहिमे अंतर्गत नगरपरिषदेचे पथक आल्यास डीजिटल पेमेंट सुविधेद्वारे भरणा करून त्याची रितसर पावती जपून ठेवावी असे आवाहन दूर्वास यांनी केले आहे. सदर घरपट्टी-पाणीपट्टी, गाळा भाडे वसुली मोहीमेस नागरिकांनी सहकार्य करून आपली घरपट्टी-पाणीपट्टी, गाळा भाडे विहित मुदतीत भरणा करावी व पुढील कायदेशीर कारवाईची कटूता टाळावी असे आवाहन दूर्वास यांनी केले आहे.