वेस्ट इंडिजच्या ड्वेन ब्राव्होला आवडते नाशिकची मिसळ

नाशिक : पुणेरी मिसळ, कोल्हापुरी मिसळ आणि ठिकठिकाणच्या मिसळ परंपरांनी आपापले स्थान निर्माण केले असले तरी नाशिकच्या झणझणीत पण तितक्याच चटकदार मिसळीचा तोरा काही औरच असतो.

ठळक मुद्देक्रिकेटपटूला नाशिकच्या मिसळची भुरळ पडलीनाशिकची मिसळ-पावदेखील खूप खूप आवडतं

नाशिक : पुणेरी मिसळ, कोल्हापुरी मिसळ आणि ठिकठिकाणच्या मिसळ परंपरांनी आपापले स्थान निर्माण केले असले तरी नाशिकच्या झणझणीत पण तितक्याच चटकदार मिसळीचा तोरा काही औरच असतो. नाशिकला येणाऱ्या कोणत्याही पर्यटकाची वा प्रवाशाची नाश्त्यासाठी पहिली पसंती मिसळीलाच असते. आता तर नाशिकच्या मिसळीचा डंका सातासमुद्रापार वाजत असून, चक्क एका विदेशी क्रिकेटपटूला नाशिकच्या मिसळची भुरळ पडली आहे. होय, वेस्ट इंडिजचा अष्टपैलू क्रिकेटपटू ड्वेन ब्राव्हो याने चक्क मराठीत बोलत नाशिकच्या मिसळीचे कौतुक केले. ‘मला नाशिक खूप खूप आवडतं आणि नाशिकची मिसळ-पावदेखील खूप खूप आवडतं. आणि माझ्या नाशिकचे लोक खूप खूप छान आहेत,’ असे तो चक्क मराठीत बोलताना दिसत आहे. ब्राव्होचे या शब्दांनी कोण्याही नाशिककराचा ऊर अभिमानाने भरून आल्याशिवाय राहणार नाही. सध्या ब्राव्हो आयपीएलनिमित्त भारतात आला असून, यंदाच्या सीजनमध्ये तो चेन्नई सुपरकिंगकडून खेळताना दिसणार आहे. दरम्यान, नाशिकचे नृत्य दिग्दर्शक सचिन खैरनार यांनी मुंबईतील पंचतारांकित हॉटेलमध्ये ब्राव्होची भेट घेतली. यावेळी ब्राव्होसोबत बोलतानाचा त्यांचा एक व्हिडीओ सोशल मीडियावर व्हायरल झाला आहे. या व्हिडीओमध्येच ब्राव्हो नाशिकची मिसळ आवडत असल्याचे सांगत आहे. सचिन खैरनार ब्राव्होला नाशिकची मिसळ मला खूप खूप आवडते असे मराठीत बोलण्यास सांगतात, तोदेखील त्यांच्या मागे मराठीत बोलत नाशिकचे कौतुक करतो. खरं तर ब्राव्होला त्याच्या मस्तमौला अंदाजासाठी ओळखले जाते. किक्रेटच्या मैदानावरच नव्हे तर डान्सच्या व्यासपीठावरही त्याने आपला जलवा दाखवून दिला आहे. एका वाहिनीच्या नृत्य कार्यक्रमादरम्यान, याचनिमित्ताने त्याची नाशिकचे नृत्य दिग्दर्शक सचिन खैरनार यांच्याशी ओळख झाली होती. सहायक नृत्य दिग्दर्शक म्हणून सचिनने ब्राव्होला विविध गाण्यांवर नृत्याचे धडे दिले.