ई-पाससाठी ‘कोविड-१९’ स्वतंत्र पोर्टलची निर्मिती

नाशिक लॉकडाउनच्या कालावधीत जिल्ह्यातील १५ प्रकारच्या अत्यावश्यक व जीवनावश्यक सेवासुविधांना परवानगी देण्यात आली आहे. या सेवासुविधांमधील उद्योग आस्थापनांनी आपल्या अधिकारी, कर्मचारी यांच्या ई-पासेससाठी जिल्ह्याच्या अधिकृत संकेतस्थळ ‘कोविड-१९’ या पोर्टलवर रीतसर आॅनलाइन अर्ज करावेत, असे जिल्हाधिकारी सूरज मांढरे यांनी कळविले आहे.लॉकडाउनच्या कालावधीत खालील अत्यावश्यक सेवा चालू ठेवण्यास शासनाने जिल्हा प्रशासनास कळविले आहे. त्यात सर्व प्रकारच्या आरोग्य सेवा, शेती व त्यासंबंधित उपक्रम व सेवा, वित्तीय सेवा, सामाजिक स्वरूपाच्या सेवा, आॅनलाइन व डिस्टन्स एज्युकेशन, मनरेगाची कामे, सार्वजनिक उपयोगाची कामे, राज्यांतर्ग व बाहेर मालवाहतूक, जीवनावश्यक वस्तूंचा पुरवठा, वाणिज्य व खासगी आस्थापना, सरकारी व खासगी उद्योग, अनुज्ञेय बांधकामे, आपत्कालीन वाहतूक, भारत सरकारची व अधीनस्त, स्वायत्त व दुय्यम कार्यालये, राज्य शासनाची स्वायत्त तसेच स्थानिक स्वराज्य संस्थांची कार्यालये या १५ प्रकारच्या सेवासुविधांचा समावेश आहे. त्यासाठी लागणारा ई-पास देण्यासाठी सोय करण्यात आली आहे.