पंचवीस लाखांच्या बक्षिसाच्या आमिषाने फसवणूक

नाशिक : पंचवीस लाखांचे बक्षीस लागल्याचे आमिष दाखवून सिडकोतील एका महिलेच्या विविध बँक खात्यातून सुमारे साडेचार लाख रुपये काढून घेत फसवणूक केल्याचा प्रकार स्टेट बँक परिसरात उघडकीस आला आहे़ या प्रकरणी अंबड पोलीस ठाण्यात फसवणुकीचा गुन्हा दाखल करण्यात आला आहे़  अंबड पोलीस ठाण्यात मोहिनी विजय टकले (रा. प्रेमनगर सोसायटी, स्टेट बँक चौक, सिडको) यांनी दिलेल्या फिर्यादीनुसार ५ ते १६ फेब्रुवारी २०१७ या कालावधीत संशयित रविकुमार व आरती शर्मा (पूर्ण नाव व पत्ता माहिती नाही) यांनी दोन वेगवेगळ्या मोबाइलवरून टकले यांच्या मोबाइलवर संपर्क साधला़ या दोघांनीही टकले यांना २५ लाखांचे बक्षीस लागल्याचे सांगून ही रक्कम परदेशी चलनात असल्याचे सांगितले़ तसेच बक्षिसाची रक्कम प्राप्त करण्यासाठी प्रक्रिया पूर्ण करावी लागणार असल्याचे सांगून स्टेट बँक आॅफ इंडिया, बँक आॅफ महाराष्ट्र व राणेनगर येथील अ‍ॅक्सिस बँकेच्या खात्यांची माहिती घेऊन त्यावर ४ लाख ३७ हजार रुपयांची रक्कम भरण्यास सांगितली़  मोहिनी टकले यांनी संशयित रविकुमार व आरती शर्मा यांनी सांगितलेल्या बँकामध्ये तब्बल चार लाख ३७ हजार रुपयांचा भरणा केला़ मात्र आपली फसवणूक झाल्याचे लक्षात येताच टकले यांनी शनिवारी (दि़२५) अंबड पोलीस ठाणे गाठून फसवणुकीची फिर्याद दिली़ (प्रतिनिधी)