इंदिरानगर : जय जगन्नाथ, जय जगन्नाथचा जयघोष आणि भजन, कीर्तनाच्या गजरात काढण्यात आलेल्या जगन्नाथ रथयात्रेने इंदिरानगर परिसरात चैतन्य पसरले होते. दुपारी ३ वाजता समर्थनगर येथील जगन्नाथ मंदिरापासून रथयात्रेला सुरुवात झाली. जगन्नाथ चौक, राजे छत्रपती चौक, सावरकर चौक, बापू बंगला मार्गे यात्रा मोदकेश्वर मंदिर येथे आली. यावेळी टाळ-मृदुंगाच्या तालावर भजन व कीर्तनाच्या गजरात भाविक तल्लीन झाले होते. रथामध्ये बलभद्र, सुभद्रा, जगन्नाथ, सुदर्शन यांच्या मूर्ती ठेवण्यात आल्या होत्या. मोदकेश्वर मंदिर येथे आठ दिवस रथयात्रा मुक्कामी आहे. यात्रेत कॅप्टन रत्नाकर बारीक, देवानंद बिरारी, अरुण कुमार सुबोधी, देवीप्रसाद पात्रा, बंडू दळवी, अरुण मुनशेट्टीवार सहभागी झाले होते.