ठळक मुद्देप्रवाशांचे हाल रिक्षा, टॅक्सी, व्हॅनचा घ्यावा लागला आधार
नाशिक: देशभर रोज वाढत चाललेल्या पेट्रोल व डिझेल दरवाढीच्या निषेधार्थ कॉँग्रेसच्या वतीने संपुर्ण भारत बंदच्या पुकारलेल्या संपाच्या पार्श्वभूमीवर सोमवारी (दि.१०) सकाळपासून शहर बससेवा ठप्प झाली आहे. त्यामुळे प्रवाशांचे हाल होत असून रिक्षा व खाजगी वाहनांचा आधार घ्यावा लागत आहे. पहाट ५.३० पासून ७ वाजेपर्यंत नाशिकमधुन बाहेरगावच्या काही मोजक्या बस धावल्या. पण सकाळी ८ नंतर पुण्या-मुंबईत आंदोलकांनी सुरु केलेल्या दगडफेकीनंतर व पुण्यात पीएमपीची बस जाळण्याची घटना घडल्यानंतर बसचे नुकसान होऊ नये यासाठी नाशिक आगारातील सर्व बसेस बंद करण्यात आल्या. सकाळपासून एकही शहर बस धावली नाही. त्यामुळे विद्यार्थी, नोकरदार व नागरिक यांना खाजगी वाहनांचा सहारा घेत इच्छित स्थळ गाठावे लागत आहे. बाकी शहरातील व्यवहार सुरळीत सुरु आहेत.