वडाळागाव : घराचा दरवाजा तोडून चोरी करण्याचे प्रकार शहरात नवीन नाहीत; परंतु चोरट्यांच्या टोळीने एका बंगल्याचे तब्बल ५० किलो वजनाचे लोखंडी गेटच चोरून नेण्याचे धाडस केले आहे. विशेष म्हणजे, बंगल्यात सर्व कुटुंबीय हजर असताना चोरट्यांनी भले मोठे गेट उचकटून नेले. शुक्रवारी (दि. १७) मध्यरात्रीच्या सुमारास हा प्रकार घडला. चोरट्यांनी गरीब नवाज कॉलनीमधील एका बंगल्याचे लोखंडी प्रवेशद्वार लंपास केल्याची घटना सकाळी उघडकीस आली आहे.येथील गरीब नवाज कॉलनीमध्ये राहणारे बाबुद्दीन शहाबुद्दीन खान यांच्या बंगल्याचे पन्नास ते साठ किलो वजनाच्या लोखंडी प्रवेशद्वारासह पाच जर्मन धातूची पातेली चोरट्यांनी हातोहात लंपास केल्याची घटना घडली आहे. नवरात्रोत्सवामध्ये चोरट्यांनी पोलीस चौकीच्या परिसरातील दोन दुकाने फोडून हजारो रुपयांचा माल चोरून नेण्याबरोबरच पोलीस चौकीच्या ओट्यावरील भंगार मालाच्या पिशव्याही लंपास करत पोलिसांना आव्हान दिले होते. या घटनेचा तपास पूर्ण होत नाही तोच गरीब नवाज कॉलनीमधील एका बंगल्यामधून चोरट्यांनी भ्रमणध्वनी पळवून नेल्याची घटना घडली होती. त्यानंतर गोपाळवाडीमध्ये घरफोडी करून चोरट्यांनी विविध वस्तू व रक्कम हातोहात लंपास केली होती. या घटनांना काही दिवस होत नाही तोच वडाळा शिवारातील खोडेनगर भागात एका बंगल्यात चोरट्यांनी डल्ला मारून हजारो रुपयांची रोकड व सोन्या-चांदीचे दागिनेही चोरून नेल्याची घटना घडली. खान यांनी तक्रार देण्यासाठी सकाळी इंदिरानगर पोलीस ठाणे गाठले; मात्र पोलिसांनी रीतसर त्यांची फिर्याद लिहून घेण्याऐवजी ‘नाव-पत्ता लिहून द्या, आमचे कर्मचारी घरी येऊन तक्रार घेतील’ असा सल्ला देऊन समजूत काढली. (वार्ताहर)