पिंपळगाव बसवंत : येथून जवळ असलेल्या आहेरगाव येथील पालखेड डावा कालव्यात विद्यार्थिनीचा मृतदेह सापडला.
कारसुळ येथील दीपिका अजय ताकाटे (१८) ही पिंपळगाव बसवंत येथील महाविद्यालयात १२ कॉमर्समध्ये शिकत होती. ती नियमितपणे निफाडरोडवरील करेकर स्टॉप येथून सकाळी बसने पिंपळगाव बसवंत येथे प्रवास करीत असे. सोमवारी (दि.१६) कॉलेज संपल्यावर ती घराकडे परतलीच नाही. सर्व शोधाशोध करून ती सापडली नाही. मंगळवारी (दि.१६) सकाळी १० वाजता आहेरगाव येथील पालखेड डावा कालव्यात तिचा मृतदेह आढळून आल्याने खळबळ उडाली. पिंपळगाव बसवंत येथून ती आहेरगाव येथे गेलीच कशी? तसेच पालखेड डावा कालवा बंद केल्याने या कालव्यात अवघे पाच फुटापर्यंत पाणी होते. पाच फुटापर्यंत पाणी असल्याने ती बुडेलच कशी? अशीही शंका व्यक्त करण्यात येत असून, तिचा घातपात झाला की अन्य प्रकार, या बाबतीत पोलीस तपास करीत असून दीपिकाचे शव विच्छेदनासाठी पिंपळगाव बसवंत येथून नाशिक जिल्हा रुग्णालयात नेण्यात आले असून, पुढील तपास पोलीस उपअधीक्षक अर्जुन भोसले, पोलीस निरीक्षक बापुसाहेब पठारे, पप्पू कादरी हे करीत आहेत. (१६ दीपिका ताकाटे)