राज्याचे उपमुख्यमंत्री अजित पवार यांच्याशी संबंधित असलेल्या जरंडेश्वर येथील साखर कारखान्यावर ईडीने केलेल्या कारवाईविषयीदेखील त्यांनी शंका उपस्थित केली. पवारांच्या आधी माजी गृहमंत्री अनिल देशमुख तसेच अन्य काही मंत्र्यांविरोधात कारवाई केली जात असून हे सर्वकाही सत्तेसाठीच सुरू असल्याचे भुजबळ यांनी म्हटले.
नाशिकमध्ये सुरू असलेल्या स्मार्ट रोडच्या कामाबाबतही त्यांनी नाराजी व्यक्त करताना शहरात स्मार्ट सिटीची अपेक्षित कामे होऊ शकली नसल्याचेही ते म्हणाले. महापालिकेची बससेवा सुरू होत असून ही सेवा महापालिकेला परवडणार आहे का? हे पाहणे महत्त्वाचे आहे. मुंबईची बेस्ट बससेवा वगळता इतर कुठेही प्रवासी बससेवा फायद्यात आलेली नाही. त्यामुळे महापालिका बससेवा सुरू करीत असली तरी तिची उपयुक्तताही पाहिली जाईल, असे भुजबळ यांनी सांगितले.