तरुणावर प्राणघातक हल्ला

सिडको : येथील गणेश चौकात चार युवकांच्या टोळक्याने जुन्या भांडणाची कुरापत काढून एका युवकास धारदार शस्त्राने तलवारीने वार करत लाकडी दांडक्याने मारहाण करीत जखमी केले आहे. या प्रकरणी अंबड पोलीस ठाणे येथे गुन्हा दाखल केला आहे. घटनेनंतर फरार झालेल्या चौघांना गुरुवारी पाथर्डी परिसरात शहर गुन्हे शाखेच्या पोलिसांनी ताब्यात घेतले आहे.संतोष उर्फ भूषण देवरे (२६, रा. गणेश चौक, सिडको) याने संशयित आकाश वानखेडे, सोनू सोनार, सचिन राठोड व तुषार निंबाळकर यांचे एक भांडण सोडविले होते. याचा राग मनात धरून सदर चारही संशयितांनी तलवारसारख्या हत्याराचा वापर करून संतोष उर्फ भूषण देवरे यास घरात जाऊन तलवारीने वार करून दांडक्याने मारहाण करून जखमी केले.शहर गुन्हे शाखेचे वरिष्ठ पोलीस निरीक्षक दिनेश बर्डेकर यांच्या नेतृत्वाखाली पोलीस उपनिरीक्षक विजय लोंढे, युवराज पाटील, यांना मिळालेल्या माहितीवरून पाथर्डी- वडनेर रस्त्यावर दर्गाजवळ संशयित आरोपी असल्याच्या माहितीवरून पोलिसांनी सापळा रचून चारही संशयितांना ताब्यात घेतले आहे व त्यांना पोलिसांच्या ताब्यात दिले. अंबड पोलिसांनी चारही संशयित आरोपी आकाश वानखेडे ( २६,रा. पाथर्डी), सोनू सोनार (२०, रा. स्वामी विवेकानंदनगर, सचिन राठोड ( २२) व तुषार निंबाळकर ( २३, रा. राजीवनगर) यांना ताब्यात घेऊन अटक केली आहे.--------घटनेनंतर जखमी संतोष यास उपचारार्थ खासगी रुग्णालयात दाखल करण्यात आले आहे. या प्रकरणी महेश देवरे याने पोलीस ठाण्यात फिर्याद दिली आहे. घटनेनंतर चारही संशयित फरार झाले होते. यानंतर अंबड पोलिसांसमवेत गुन्हे शाखेचे विभागाने तपास सुरू केला.