घोटी : घोटी - सिन्नर मार्गावर दौंडत फाट्याजवळ मंगळवारी रात्री ९ वाजेच्या सुमारास दुचाकी व ट्रकमध्ये झालेल्या भीषण अपघातात एक ठार, तर एक गंभीर जखमी झाला. सिन्नर येथून मुंबईकडे ऊस घेऊन जाणारा ट्रक (क्र. एमएच १२ सीटी ६८३७) दौंडत फाट्याजवळ चालकाचा ताबा सुटल्याने समोरून येणाऱ्या दुचाकीला (क्र. एमएच १५ डीटी ५९३८) धडकल्याने दुचाकीस्वार निखिल खंडू शिंदे (२४), रा. दौंडत जागीच ठार झाला, तर मागे बसलेला सागर नामदेव शिंदे (२५) गंभीर जखमी झाला. जखमीला तातडीने नाशिक जिल्हा रुग्णालयात दाखल करण्यात आले असून, त्याची स्थिती नाजूक असल्याचे डॉक्टरांचे म्हणणे आहे. अपघातानंतर ट्रकचालक फरार असून, याबाबत घोटी पोलीस ठाण्यात गुन्हा नोंद करण्यात आला आहे. घटनेची माहिती मिळताच परिसरातील नागरिकांनी घटनास्थळी धाव घेत जखमी शिंदे यास ग्रामीण रुग्णालयात दाखल केले. पुढील उपचारासाठी त्याला नाशिक येथे हलवण्यात आले. फाटा परिसरात अपघातांची मालिकाच सुरू असून, येथे रस्त्याला उतार जास्त असल्याने भरधाव असणाºया वाहनांवरील ताबा सुटून अपघातास निमंत्रण दिले जात आहे. फाट्यावर गतिरोधक टाकण्याची मागणी नागरिकांनी केली आहे.
सिन्नर-घोटी मार्गावर अपघातात तरु ण ठार
By लोकमत न्यूज नेटवर्क | Updated: March 29, 2018 00:31 IST