लासलगाव बाजार समितीसाठी २७२ उमेदवारी अर्ज

निवडणूक : तिरंगी लढत होणार, महिला राखीव गटासाठी २० अर्ज दाखल

 लासलगाव : लासलगाव कृषी उत्पन्न बाजार समिती संचालक मंडळाच्या निवडणुकीत २७२ उमेदवारी अर्ज दाखल झाले असून, तिरंगी लढत होणार असल्याचे चित्र दिसत आहे.निवडणुकीत सोसायटी सर्वसाधारण मतदारसंघात ९७ उमेदवारी अर्ज, सोसायटी महिला राखीव गटाकरिता २० उमेदवारी अर्ज, सोसायटी इतर मागास प्रवर्गाकरिता २१ उमेदवारी अर्ज, सोसायटी भटक्या विमुक्त जमातीकरिता १८ उमेदवारी अर्ज दाखल झाले असून ग्रामपंचायत मतदारसंघात साधारण मतदारसंघात ४१ उमेदवारी अर्ज, ग्रामपंचायत अनुसूचित जाती-जमातीकरिता १६ उमेदवारी अर्ज, ग्रामपंचायत आर्थिक दुर्बल घटकाकरिता २२ उमेदवारी अर्ज दाखल झाले.दाखल झालेल्या उमेदवारी अर्जांमध्ये माजी आमदार कल्याणराव पाटील तसेच विद्यमान सदस्य मंडळातील सदस्य नानासाहेब पाटील, जयदत्त होळकर, पंढरीनाथ थोरे, राजेंद्र डोखळे, बाळासाहेब क्षीरसागर, विजय सदाफळ, इंदुमती तासकर, तान्हाजी पूरकर, शिवाजी तासकर, बबन सानप, शिवाजी ढेपले, नंदकुमार डागा, सचिन ब्रह्मेचा, दिलीप गायकवाड, सुभाष कराड, डी. के. जगताप, सुवर्णा जगताप, दत्तात्रय डुकरे, मधुकर गायकर, ज्ञानेश्वर गांगुर्डे, अशोक गवळी, भीमराज काळे, आशिष मोगल, रामकृष्ण दराडे, अनिल क्षीरसागर, विशाल पालवे, सुनील शिंदे, संजय वाकचौरे, बाळासाहेब दराडे आदिंचा समावेश आहे.दरम्यान, बाजार समितीच्या या निवडणुकीत प्रस्थापितांमुळे नवीन चेहऱ्यांना संधी मिळत नसल्याने वाढणारी इच्छुकांची गर्दी नेत्यांच्या दृष्टीने डोकेदुखी ठरणार आहे. तिसरे पॅनल तयार करण्याच्या हालचाली सुरू झाल्या आहेत.लासलगाव बाजार समितीची निवडणूक बिनविरोध होण्याची शक्यता जवळपास मावळली आहे. तिरंगी लढत होण्याचे संकेत प्राप्त होत आहे. लासलगाव बाजार समितीत सध्या माजी उपमुख्यमंत्री आमदार छगन भुजबळ यांच्या मार्गदर्शनाखाली संचालक मंडळ कामकाज पहात आहे. परंतु ईडीच्या कारवाईत ते सध्या न्यायालयीन कोठडीत आहे. त्यामुळे त्यांच्या अनुपस्थितीत त्यांचे समर्थक काय करणार याची चर्चा सुरू आहे. (वार्ताहर)