कोठार : तळोदा तालुक्यातील धवळीविहीर येथे आयोजित करण्यात आलेल्या लसीकरण शिबिरात एकाच दिवशी तब्बल १०० जणांनी उस्फूर्तपणे लसीकरण केले. सुंतूबाई गणपत पावरा या ८५ वर्षीय महिलेला लस देऊन लसीकरणाची सुरुवात करण्यात आली.
धवळीविहिर येथील लसीकरण शिबिरात सोमावल आरोग्य केंद्राचे आरोग्य अधिकारी डॉ. सुधीर ठाकरे यांनी कोरोना प्रतिबंधात्मक लसीकरणाचे महत्त्व व लसीकरणाबाबत असणारे वेगवेगळ्या प्रकारचे प्रश्न, गैरसमज दूर करण्यासाठी माहिती दिली. या शिबिरात गावातील १०० महिला व पुरुष यांनी स्वयंस्फूर्तीने लसीकरण करण्यासाठी हजेरी लावत लसीकरण करून घेतले. याप्रसंगी डॉ. सुधीर ठाकरे व त्यांचे संपूर्ण आरोग्य विभागाचे कर्मचारी, मुख्याध्यापक प्रताप वळवी व सर्व कर्मचारी वृंद, पोलीस पाटील हिरालाल पावरा, तंटामुक्त समिती अध्यक्ष रायसिंग परमार, सुभाष पावरा, कांतीलाल पटले, मुकेश कापुरे, ॲड. दारासिंग पावरा, ग्रामसेवक हारसिंग पावरा, सर्व सदस्य, ग्रामपंचायत कर्मचारी, अंगणवाडी सेविका, आशा कार्यकर्ती, नागेश पावरा, वसंत पावर, दिनेश पावरा, अनिल परमार आदींनी सहकार्य केले.
आठवडाभर शिबिर घेण्याची ग्रामस्थांची मागणी
धवळीविहिर हे तळोदा तालुक्यातील शंभर टक्के आदिवासी लोकवस्ती असलेले गाव आहे. गावात पहिल्या दिवशी तब्बल १०० जणांनी लसीकरण करून एक आदर्श निर्माण करून दिला आहे. लसीकरणाचे कोणत्याही प्रकारचे तोटे नसून लोकांनी उस्फूर्तपणे लसीकरण करावे हाच संदेश धवळीविहीरकरांनी या लसीकरण शिबिरातून दिला आहे.
धवळीविहीर गावाची लोकसंख्या तीन हजाराच्या जवळपास असून संपूर्ण गावाचे १०० टक्के लसीकरण करण्यासाठी प्रशासनाने सलग आठवडाभर लसीकरण शिबिर आयोजित करावे, अशी धवळीविहीर ग्रामस्थांची मागणी आहे.