नंदुरबार जिल्ह्यात दोन वेगवेगळ्या अपघातात दोनजण ठार

नंदुरबार : जिल्ह्यात दोन वेगवेगळ्या अपघातात दोनजण ठार झाल्याची घटना घडली. याबाबत तळोदा व धडगाव पोलीस ठाण्यात गुन्हा दाखल करण्यात आला आहे.

पहिला अपघात तळोदा-अक्कलकुवा रस्त्यावर नळगव्हाण फाट्याजवळ घडला. लादी व लादीची पावडर घेऊन जाणारा भरधाव ट्रकवरील (क्रमांक जीजे ३६-टी ०३५८) चालकाचा ताबा सुटल्याने ट्रकने रस्त्याच्या कडेला असलेल्या निलगिरीच्या झाडाला धडक दिली. त्यात चालक हरदेवसिंह जगुम इझाला रा. रातीदेवली, ता. बाकानेर हे जखमी झाले. उपचार घेताना त्यांचा मृत्यू झाला. याबाबत हवालदार गोवर्धन वसावे यांनी फिर्याद दिल्याने तळोदा पोलिसात अपघाताची नोंद करण्यात आली. तपास पोलीस निरिक्षक पंडित सोनवणे करीत आहे.

दुसरी घटना धनाजे बुद्रूकचा डुगटीपाडा, ता. धडगाव येथे घडली. शिंदवाणीचा आमलीटूरपाडा, ता.धडगाव येथील सर्वीस बहादऱ्या पावरा हे आपल्या दुचाकीने (क्रमांक एमएच १९-के ६४६९) भरधाव जात असतांना त्यांचा ताबा सुटला. त्यामुळे दुचाकी रस्त्यालगतच्या झाडाला धडकली. त्यात त्यांना गंभीर मार लागल्याने त्यांचा मृत्यू झाला. तर त्यांच्यामागे बसलेले जयसिंग बहादऱ्या पावरा व रुमा सामा पाडवी हे जखमी झाले. याबाबत बहादऱ्या पावरा यांनी फिर्याद दिल्याने धडगाव पोलीस ठाण्यात अपघाताची नोंद करण्यात आली आहे. तपास पोलीस कर्मचारी वसईकर करीत आहे.