लोकमत न्यूज नेटवर्क
सारंगखेडा : शहादा-सारंगखेडा रस्त्यावर सप्तशृंगी पेट्राेल पंपाजवळ दोन मोटारसायकलींची समोरासमोर धडक होऊन तीन जण ठार झाल्याची घटना मंगळवारी सायंकाळी घडली. या घटनेत एक महिला जखमी झाली आहे. मृतांमध्ये मामा-भाच्याचा समावेश आहे.
याबाबत वृत्त असे की, अक्षय रामा पाडवी हे आपल्या मोटारसायकल क्रमांक एमएच १८- एयू ६९०६ ने तीन सीट बसवून शहाद्याकडून सारंगखेडाकडे येत होते. त्याला समोरून येणाऱ्या एमएच १८- बीएस ७५१५ या मोटारसायकलने धडक दिल्याने, अक्षय रामा पाडवी (३३) रा.अनरद, ता.शहादा व त्याचे मामा मोतीलाल मंगा भिल (३७) रा.होळ, ता.नंदुरबार हे खाली पडले. त्यांना जबर मार लागल्याने दोन्ही जण जागीच ठार झाले. या मोटारसायकलवर असलेल्या सताबाई मोतीलाल भिल रा.होळ, ता.नंदुरबार या जखमी झाल्या, तर धडक देणाऱ्या मोटारसायकलस्वार गंभीर जखमी झाला. त्याला उपचारासाठी म्हसावद ग्रामीण रुग्णालयात हलविले असता, उपचार सुरू असताना त्याचा मृत्यू झाला. संबंधित व्यक्ती हा मुकटी, ता.धुळे येथील रहिवासी असून, त्याची ओळख अद्याप पटलेली नाही.
या प्रकरणी सारंगखेडा पोलीस ठाण्यात बापू धर्मा पाडवी रा.अनरद यांच्या फिर्यादीवरून मुकटी, ता.धुळे येथील अज्ञात मृत व्यक्ती विरुद्ध गुन्हा नोंदविण्यात आला आहे. घटनास्थळी उपविभागीय पोलीस अधिकारी श्रीकांत घुमरे व सारंगखेडा पोलीस ठाण्याचे पोलीस निरीक्षक राजेश शिरसाठ यांनी भेट देऊन चौकशी केली.