शहाद्यातील अरिहंत नगरात चोरट्यांचेही ‘मिशन बिगीन’

लोकमत न्यूज नेटवर्कनंदुरबार : शहादा शहरातील अरिहंत नगरातील बंद घराचा दरवाजा जाळून चोरट्यांनी घरातील दोन लाख रुपयांचा मुद्देमाल लंपास केल्याचा प्रकार मंगळवारी सकाळी उजेडात आला़ जनजीवन पूर्वपदावर येत असताना चोरटे पुन्हा सक्रीय झाल्याने नागरिकांमध्ये चिंता व्यक्त होत आहे़अरिहंत नगरातील प्रविण भिका चौधरी यांच्या मालकीच्या घरात हा प्रकार घडला असून सोमवारी रात्र ते मंगळवारी पहाटेदरम्यान अज्ञात चोरट्यांनी चौधरी यांच्या घराचा मुख्य दरवाजा अर्धवट जाळून घरात प्रवेश मिळवला होता़ घरात ठेवलेले १ लाख ३२ हजार रुपयांचे सोन्या-चांदीचे दागिने़ १५ हजार रूपये किमतीचा एलसीडी टिव्ही, ५८ हजार रूपयांची रोख रक्कम आणि ३ हजार रूपयांचे जुने कपडे चोरट्यांनी चोरुन नेले़ सकाळी हा प्रकार उजेडात आल्यानंतर एकच खळबळ उडाली़ याबाबत प्रविण चौधरी यांनी शहादा पोलीस ठाण्यात दिलेल्या फिर्यादीवरुन अज्ञात चोरट्यांविरोधात गुन्हा दाखल करण्यात आला असून तपास पोलीस उपनिरीक्षक विक्रांत कचरे करत आहेत़