तळोदा तालुक्यातील कढेल या गावात १८ जानेवारी रोजी नितीन प्रकाश पाटील यांच्या पपईच्या शेतात एका अज्ञात इसमाच्या डोक्यात दगड टाकून खून झाल्याची घटना घडली होती. या माहितीवरून पोलीस निरीक्षक नंदराज पाटील, सहायक पोलीस उपनिरीक्षक अविनाश केदार, अजय पवार, कमलेश जाधव, युवराज चव्हाण यांनी तत्काळ घटनास्थळी भेट दिली. गुन्ह्याचे गांभीर्य ओळखून व्यवसायिक कौशल्य वापरून मयताची ओळख पटविणे शक्य नसताना ती पटवली. आरोपीने कोणताही सबळ पुरावा सोडलेला नसताना वरील पोलीस अधिकाऱ्यांनी व कर्मचाऱ्यांनी संशयित आरोपीचा कसून शोध घेऊन त्याला ताब्यात घेतले.
वरिष्ठांना गुन्ह्याच्या तपासात मदत करून सदर गुन्ह्यास सहा तासाच्या आत उघडकीस आणल्याप्रकरणी तळोदा पोलीस स्टेशनच्या कर्मचाऱ्यांचे पोलीस अधीक्षक महेंद्र पंडित यांनी कौतुक करून प्रशस्तीपत्राने गौरव केला.