पहिली ते आठवीच्या विद्यार्थ्यांसाठी ‘शिकू आनंदे’ उपक्रम

मार्च २०२० पासून कोरोनाच्या प्रादुर्भावामुळे राज्यातील सर्व शाळा बंद आहेत. शाळा बंद असल्या तरी मुलांचे शिकणे सुरु रहावे या हेतूने राज्य शैक्षणिक संशोधन व प्रशिक्षण परिषदेमार्फत ऑनलाइन पद्धतीने विविध कार्यक्रम घेण्यात येत आहे. शाळा बंद व लॉकडाऊनमुळे शहरी भागात बहुतांश मुले ही घरातच बंदिस्त आहेत. खेळण्याच्या वयात मुले घरात बंदिस्त झाल्याने अनेक प्रकारच्या शारीरिक व मानसिक समस्या मुलांमध्ये निर्माण होऊ शकतात. या बाबींचा विचार करून परिषदेच्या सामाजिकशास्त्र व कला, क्रीडा विभागामार्फत पहिली ते आठवीच्या वर्गात अध्ययन करणाऱ्या राज्यातील सर्व मुलांसाठी कला, शारीरिक शिक्षण व कार्यानुभव या विषयांच्या अभ्यासक्रमावर आधारित दर शनिवारी ऑनलाइन पद्धतीने ‘शिकू आनंदे’ हा उपक्रम ३ जुलै २०२१ पासून राज्यभर सुरु करण्यात येणार आहे. मुलांचे शिकणे आनंददायी व्हावे, घरबसल्या मुलांचा शारीरिक व्यायाम व्हावा, मुलांनी छोट्या छोट्या कृती पहाव्यात, कराव्यात, कृती द्वारा आनंददायी पद्धतीने मुले शिकवीत हा या उपक्रमाचा प्रमुख हेतू आहे. प्रत्येक शनिवारी सकाळी ९ ते ११ अशी कार्यक्रमाची वेळ असणार असून यामध्ये सकाळी ९ ते १० या वेळेत पहिली ते पाचवीच्या मुलांसाठी कला, शारीरिक शिक्षण व कार्यानुभव विषयाच्या कृती व सकाळी १० ते ११ या वेळेत सहावी ते आठवीच्या मुलांसाठी कला, शारीरिक शिक्षण व कार्यानुभव विषयाच्या कृती घेण्यात येणार आहेत. या कार्यक्रमात यू-ट्युब लिंकद्वारे विद्यार्थ्यांना सहभागी होता येणार आहे. याबाबत राज्य शैक्षणिक संशोधन व प्रशिक्षण परिषदेचे संचालक दिनकर टेमकर यांनी उपसंचालक प्रादेशिक विद्या प्राधिकरण मुंबई, जिल्हा शिक्षण व प्रशिक्षण संस्थेचे सर्व प्राचार्य, राज्यातील सर्व प्राथमिक व माध्यमिक शिक्षणाधिकारी यांना आपल्या कार्यक्षेत्रातील सर्व शाळा व विद्यार्थ्यांपर्यंत ही माहिती पोहोचवावी व जास्तीत जास्त विद्यार्थी या उपक्रमात सहभागी होतील याबाबत योग्य कार्यवाही करण्याचे सूचित केले आहे.