शहरात विविध रस्त्यांवर ठिकठिकाणी बॅरिकेट्स लावून रस्ते बंद करण्यात आले आहेत. त्यात गरीब नवाज कॉलनी, खेतिया रस्ता, जुना प्रकाशा रस्ता, तसेच अन्य ठिकाणी पालिका प्रशासनाने बॅरिकेट्स लावली आहे. शहरात सकाळी सहा वाजल्यापासूनच पोलीस गस्त करीत होते. मुख्य रस्त्यांवर पोलीस बंदोबस्त तैनात करण्यात आला आहे. शहरातील मुख्य वर्दळ असलेल्या पुरुषोत्तम मार्केट, का. स. पाटील मार्केट, चार रस्ता, मेन रोड, खेतिया रस्ता, भाजी मार्केट, बसस्थानक आवारात कमालीचा शुकशुकाट होता. जनता चौक, चार रस्ता, पाण्याची टाकी, खेतिया रस्ता, डोंगरगाव रस्ता, तूपबाजार, गरीब नवाज कॉलनी, मेमन कॉलनी, डोंगरगाव रस्ता यासह प्रमुख रस्ते बॅरिकेट्स लावून बंद केले आहेत. सर्वत्र पोलीस बंदोबस्त तैनात केलेला आहे. ग्रामीण भागातील कोणतेही वाहन शहरात दाखल होणार नाही याची विशेष काळजी घेतली जात आहे. अत्यावश्यक सेवा वगळून सर्व व्यवहार बंद आहेत.
प्रांताधिकारी डॉ. चेतनसिंग गिरासे, उपविभागीय पोलीस अधिकारी श्रीकांत घुमरे, मुख्याधिकारी राहुल वाघ, तहसीलदार डॉ. मिलिंद कुलकर्णी, पोलीस निरीक्षक दीपक बुधवंत, तालुका वैद्यकीय अधिकारी डॉ. राजेंद्र वळवी, स्वच्छता निरीक्षक आर. एम. चव्हाण, नगरपालिका अभियंता संदीप टेंभेकर, मंडळ निरीक्षक पी. बी. अमृतकर, आदी अधिकारी शहरात फिरून मुख्य रस्त्यांवर गस्त करीत होते. शहरातील वाढती रुग्णांची संख्या बघता रुग्णवाहिकादेखील कमी पडल्या आहेत. एकंदरीत शहरात पूर्णतः व्यवहार ठप्प असून, शुकशुकाट आहे.
दरम्यान, जिल्हाधिकारी डॉ. राजेंद्र भारूड यांनी अगोदरच आठवडाभरापूर्वी जिल्ह्यात दर शनिवारी व रविवारी जनता कर्फ्यू राहणार असल्याची माहिती प्रसिद्धी माध्यम व शहरातील गल्लीबोळात रिक्षाने भ्रमणध्वनीद्वारे नागरिकांना सूचित करण्यात आले होते. असे असतानादेखील विनाकारण शहरात मोटारसायकलीवर फिरणाऱ्या वाहन चालकांवर पोलिसांनी कारवाई केली. रविवारी रस्त्यावर कोणीही विनाकारण फिरू नये, अन्यथा कारवाई करण्याचे आदेश पोलीस प्रशासनाकडून देण्यात आले आहेत.