प्रकाशा येथे मास्क न वापरणाऱ्या वाहनचालकांवर दंडात्मक कारवाई

प्रकाशा हे तालुक्यातील मोठे गाव आहे. गावात बाजारहाट करण्यासाठी परिसरातील गावातील नागरिक येत असल्याने गर्दी होते. गावात ये-जा करणारे वाहनधारक विनामास्क फिरताना आढळून येतात. या गावातही कोरोनाचे रुग्ण वाढत आहेत, म्हणून पोलीस विभागाकडून मोहीम राबविण्यात येत आहे. शहादा येथील पोलीस निरीक्षक दीपक बुधवंत यांच्या मार्गदर्शनाखाली महिला पोलीस अधिकारी माया राजपूत, पोलीस कर्मचारी विलास शिरसाठ, प्रकाशा पोलीस दूरक्षेत्राचे सुनील पाडवी, रामा वळवी, पंकज जिरेमाळी आदींनी शहादा-प्रकाशा रस्त्यावर विनामास्क फिरणारे दुचाकी, चारचाकी, माल ट्रक, वाळूचे डंपर व इतर वाहनांचे चालक विनामास्क आढळून आल्यानंतर त्यांच्यावर प्रत्येकी २०० रुपयेप्रमाणे दंडात्मक कारवाई करण्यात आली. या मोहिमेत सातत्य ठेवण्याची अपेक्षा सुज्ञ नागरिकांकडून व्यक्त होत आहे.