अक्कलकुव्यात वीजपुरवठा सुरळीत

शहरातील डॉ. बंगाली यांच्या दवाखाना समोरील दोन, असलम हॉस्पिटल व बर्फ कारखाना ट्रान्सफाॅर्मर्स १० दिवसांपासून खराब झाले होते. याबाबत नागरिकांच्या सातत्याने तक्रारी सुरु होत्या. दरम्यान ट्रान्सफाॅर्मर उपलब्ध नसल्याने तसेच अक्कलकुवा येथील वीज कंपनीचे उपकार्यकारी अभियंत्यांसह इतर काही कर्मचारी कोरोनाबाधित असल्याने तळोदा येथील येथील उपकार्यकारी अभियंता मनोज चहांदे यांच्याकडे पदभार सोपवण्यात आला होता. त्यांनी समस्या विचारात घेत शहादा विभागाकडे संपर्क करत ट्रान्सफाॅर्मरची मागणी केली होती. यासाठी सातत्याने पाठपुरावा सुरू करण्यात आला होता. शहरातील शेरमहंमद मक्राणी व दाद महंमद मक्राणी यांनीही कंपनीला कळवून ट्रान्सफाॅर्मर देण्याची मागणी केली होती. मंगळवारी सर्व चार ट्रान्सफाॅर्मर्स हे बसवण्यात आल्याने वीजपुरवठा सुरळीत झाल्याची माहिती देण्यात आली आहे. दरम्यान शहरात ट्रान्सफाॅर्मर्स नादुरुस्त होण्यामागे वीज चोरी असल्याचे सांगण्यात येत आहे. यामुळे याठिकाणी बंदिस्त केबल टाकून वीजपुरवठा करावा, अशी मागणी होत आहे.