शहादा : काळ्या बाजारात विक्रीसाठी घेऊन जाण्यात येत असलेला तांदूळ पोलिसांनी ताब्यात घेत सातजणांवर कारवाई केली. यादरम्यान पोलिसांनी ९ लाख रुपयांचा मुद्देमालही ताब्यात घेतला. एक मे रोजी पहाटे तीन वाजेच्या सुमारास ही कारवाई करण्यात आली.
शहादा तालुक्यातील पाडळदा परिसरातील स्वस्त धान्य दुकानातून रेशनिंगचा तांदूळ हा तळोदाकडे जाणार असल्याची माहिती शहादा पोलिसांना मिळाली होती. या पार्श्वभूमीवर शहादाचे उपविभागीय पोलीस अधिकारी श्रीकांत घुमरे व शहादाचे पोलीस निरीक्षक दीपक बुधवंत यांनी ३० एप्रिलपासून पाडळदा ते भादा रस्त्यावरील पिंगाने गावालगत पोलिसांचा बंदोबस्त लावला होता. दरम्यान, १ मे रोजी पहाटे अडीच ते तीन वाजेच्या सुमारास पाडळदा चौफुलीकडून पिंगाने पुलावरून एमएच ३९ डब्ल्यू ०१९४ हा मालवाहू येत असल्याचे गस्तीवर असलेल्या पोलीस कर्मचाऱ्यांना दिसून आले. त्यांनी ते वाहन थांबवून विचारपूस केली असता वाहनातील एका युवकाने पोलीस कर्मचाऱ्यांशी हुज्जत घालून वादावादी करण्यास सुरुवात केली. यात भर म्हणून पोलीस कर्मचारी वाहन सोडत नसल्याची माहिती तळोदा तालुक्यातील काहीजणांना फोनद्वारे देत बोलावूनही घेतले. काही वेळाने पाच ते सातजण याठिकाणी दाखल झाले. त्यांनी रस्त्यावर असलेल्या पोलीस कर्मचाऱ्यास मारहाण करून त्यांच्या हाताला दुखापत केलेली आहे.
गैरमार्गाने तांदूळ घेऊन जाणारी व्यक्ती पोलीस प्रशासनाच्या सूचना न ऐकता दादागिरी करून तो तांदूळ नेण्याच्या प्रयत्न करीत होती. मात्र, पोलीस कर्मचाऱ्यांनी दीपक बुधवंत, पोलीस उपनिरीक्षक नीलेश वाघ यांच्याशी संपर्क करत कुमक मागवून घेतली. दरम्यान, तांदूळ वाहून नेणारे वाहन घेऊन जाण्याचा प्रयत्न करणाऱ्या सातजणांना पोलिसांनी अटक केली आहे. त्यांच्याकडून एमएच ३९ डी २१२२ हे चारचाकी वाहनही जप्त करण्यात आले. वाहनासोबत तांदूळही पोलिसांनी ताब्यात घेतला आहे.
शहादाचे पोलीस निरीक्षक दीपक बुधवंत यांनी मिळालेल्या माहितीवरून ही कारवाई केल्याची माहिती दिली आहे. पोलीस प्रशासनाकडून करण्यात आलेल्या कारवाईमुळे स्वस्त धान्य दुकानातून काळ्या बाजारात नेण्यात येणाऱ्या गहू आणि तांदळाचा अवैध व्यवसाय उजेडात येणार आहे.
याबाबत पोलीस कर्मचारी भरत पुंडलिक उगले यांनी शहादा पोलीस ठाण्यात दिलेल्या फिर्यादीवरून दीपक मनोहर कलाल (रा. गणपती गल्ली, तळोदा), योगेश दशरथ पाटील (२४, रा. तळोदा), अशोक शनू वाडीले व सुनील अशोक वाडीले (दोघे रा. शहादा, जुनी पोस्ट गल्ली, धानका दलपूर), जगन तुकाराम सोनवणे व प्रवीण धानका (दलपूर) यांच्याविरोधात शासकीय कामात अडथळा आणल्याचा गुन्हा दाखल करण्यात आला असून, अटक करण्यात आलेली आहे.