नंदुरबार : नंदुरबारातील पेट्रोलच्या भावापेक्षा लगतच्या १६ कि.मी. अंतरावरील निझर (गुजरात)येथील पेट्रोलचा भाव दहा रुपयांनी कमी असल्यामुळे नंदुरबारसह परिसरातील वाहनधारकांचा पेट्रोल भरण्यासाठीचा मोर्चा निझरकडे वळत आहे. डिझेलच्या भावात मात्र केवळ ४७ पैशांचा फरक आहे.
महाराष्ट्रात पेट्रोल व डिझेलच्या भावाने शंभरी गाठण्याची तयारी केली आहे. नंदुरबारात सोमवार, २२ रोजी पेट्रोलचा भाव ९७.८६ रुपये लीटर इतका होता तर डिझेलचा भाव ८७.५७ रुपये लीटर इतका होता. इंधनाच्या वाढत्या भावामुळे सामान्य नागरिकांचा आर्थिक बजेट कोलमडत आहे. दुसरीकडे लगतच्या गुजरातमध्ये मात्र पेट्रोलच्या भावात तब्बल पाच रुपयांची तफावत आहे. नंदुरबारपासून १६ किलोमीटर अंतरावर असलेल्या निझर येथील पेट्रोलपंपावर पेट्रोलचा भाव ८७.६७ रुपये लीटर इतका आहे. नंदुरबारपेक्षा तेथील भावात १० रुपये १९ पैशांची तफावत आहे. तर गुजरातमध्ये डिझेलचा भाव ८७.१० रुपये लीटर आहे. नंदुरबारपेक्षा तेथील डिझेलचा भावात फारसा फरक नाही. केवळ ४७ पैशांनी डिझेल स्वस्त आहे.
गुजरात सिमेलगत असलेल्या नंदुरबार, नवापूर, तळोदा व अक्कलकुवा तालुक्यातील अनेक दुचाकीधारक गुजरातमध्ये पेट्रोल भरण्यासाठी धाव घेत आहेत. त्यामुळे गेल्या दोन महिन्यांपासून निझर, उच्छल, सोनगड, कुकरमुंडा येथील पंपांवरील पेट्रोलची विक्री २५ टक्केपेक्षा अधिक वाढली असल्याचे तेथील चालकांनी सांगितले.