शहादा तालुक्यात वाढत्या कोरोना रुग्णांची संख्या पाहता मोहिदा गावालगत १०० बेडचे कोविड केअर सेंटर उभारण्यात येत आहे. त्याचबरोबर ऑक्सिजन प्लांटदेखील उभारला जात आहे. त्याची पाहणी जिल्हाधिकारी डॉ. राजेंद्र भारूड व जिल्हा परिषदेचे मुख्य कार्यकारी अधिकारी रघुनाथ गावडे यांनी केली. यावेळी प्रांताधिकारी डॉ. चेतनसिंग गिरासे, तहसीलदार डॉ. मिलिंद कुलकर्णी, जि.प.चे माजी कृषी सभापती अभिजित पाटील, शहादा पालिकेचे गटनेते मकरंद पाटील, मुख्याधिकारी डॉ.राहुल वाघ, गटशिक्षण अधिकारी उषा पेंढारकर, गटविकास अधिकारी राघवेंद्र घोरपडे, तालुका आरोग्य अधिकारी डॉ. राजेंद्र वळवी, तालुका विस्तार अधिकारी भरत निकम, अधिकारी व कर्मचारी उपस्थित होते.
यावेळी डॉ. भारुड म्हणाले की, नंदुरबार जिल्ह्यात आधीपासूनच आरोग्य व्यवस्था मजबूत नसल्याने कोविड काळात रुग्णांना उपचारासाठी आरोग्य विभागाला मोठी कसरत करावी लागत आहे. जिल्ह्यातील शहादा आणि नंदुरबार हे दोन तालुके कोरोनाचे हॉटस्पॉट ठरत आहेत. सध्या जिल्ह्यात नऊ हजारापेक्षा अधिक ॲक्टीव कोरोना रुग्ण असून, एकट्या शहादा तालुक्यातील जवळपास तीन हजार रुग्ण बाधित आहेत. एवढ्या साऱ्या रुग्णांच्या उपचारासाठी पुरेशी व्यवस्था नसल्याने ती करणे गरजेचे झाले आहे. शहादा तालुक्यात ४५ वर्षे वयावरील नागरिकांचे लसीकरण होणे गरजेचे होते; मात्र ग्रामीण भागात वॅक्सिन पुरवठा कमी झाल्यामुळे लसीकरण होऊ शकले नाही. सव्वा ते दीड लाख लोकांचे लसीकरण होणे गरजेचे होते. त्यापैकी १९ ते २० हजार लोकांचे लसीकरण झालेले आहे, ही चिंतेची बाब आहे. लसीकरण झाल्यानंतर २१ दिवसात ह्युमॅनिटी तयार होत असते. सुरुवातीच्या काळामध्ये ग्रामीण भागात १५ ते २० टक्के रुग्णसंख्या होती. त्यादरम्यान शहरात ८० टक्के रुग्णांची संख्या वाढली होती; मात्र या दुसऱ्या टप्प्यातील कोरोना संसर्गामुळे शहर व ग्रामीण भागात आता ४० ते ५० टक्के रुग्णांची संख्या वाढत चाललेली आहे. ग्रामीण भागातील प्राथमिक आरोग्य केंद्रांमध्ये विलगीकरण कक्ष स्थापन करण्याचे आदेश देण्यात आलेले आहे. ज्याठिकाणी जास्त पेशंट असेल तेथे रुग्णाला विलगीकरण कक्षात दाखल करण्यात यावे. मागच्या व्हायरसपेक्षा दहा पटीने वाढ होत असल्याने रुग्णांना ताप, खोकला आढळल्यास त्यांनी त्वरित वैद्यकीय उपचार करून घ्यावा. पॉझिटिव्ह आल्यास रुग्णालयात दाखल व्हावे, असेही जिल्हाधिकारी डॉ.भारूड यांनी सांगितले. शहादा तालुक्यातील मोहिदा येथे १०० बेड ऑक्सिजन असलेले सेंटर लवकरच सुरू होत आहे. याठिकाणी शासकीय व खासगी वैद्यकीय सेवा देणाऱ्या डॉक्टर व नर्सेस नियुक्त करण्यात आलेल्या आहेत. रुग्णांना मिळणारे भोजन हे उत्तम प्रतीचे दिले जाणार असून, कोविड सेंटरला दाखल झालेला रुग्ण हा घरीच उपचार घेत असल्याची त्याला जाणीव होणार आहे. प्रशासन प्रत्येक कोविड सेंटरला विशेष लक्ष नियंत्रित करणार आहे.
अभिजित पाटील म्हणाले की, शहर व ग्रामीण भागात कोरोनाच्या रुग्णांची बिकट परिस्थिती निर्माण झालेली आहे. रुग्णांना ऑक्सिजन उपलब्ध करून देण्याच्या मागणीसोबत आवश्यक असलेले औषध व इंजेक्शन पुरवठा शासनाकडून वेळोवेळी उपलब्ध करून देण्याची मागणीही त्यांनी केली. प्रा.मकरंद पाटील यांनी शहादा शहर व ग्रामीण भागात जास्तीत जास्त नागरिकांना लसीकरण कसे सुरू करता येईल, यासाठी केंद्र स्थापन करून लस उपलब्ध करून देण्याची मागणी केली. लस दिल्यामुळे रुग्णांना त्याचा फायदा होणार आहे.