शहादा-खेतिया मार्गावर दरा फाट्याजवळील सुसरी धरणाचा विचार करून ‘एस’ आकार असलेला वळण रस्ता काढण्यात आला आहे. या मार्गावरील भरधाव वेगाने वाहनाचा तोल वळण रस्त्यावर समोरून येणाऱ्या वाहनावर आदळल्याचे चित्र नेहमी पहावयास मिळते. यामुळे लहान-मोठे अपघातही नेहमी होतात.
सध्या कोळदा-खेतिया या आंतरराज्य मार्गाचे काम सुरू आहे. हा मार्ग पूर्ण झाल्यानंतर या मार्गावर वाहनांची संख्या वाढेल. त्यामुळे या वळणावर अपघाताचे प्रमाणही वाढण्याची शक्यता आहे. वास्तविक या रस्ता बांधणीच्या तांत्रिक चुकांमुळे वळण धोकादायक बनले आहे. इंग्रजी 'एस' आकाराच्या सलग वळणामुळे अपघाताचे प्रमाण अधिक आहे. विशेष म्हणजे अपघातास प्रतिबंध करणाऱ्या कोणत्याही सुविधा नाहीत. यापूर्वी याठिकाणी अपघाताच्या घटनाही घडल्या आहेत.
वळणाची तीव्रता कमी करणे आवश्यक
शहादा-खेतिया रस्त्यावर मोठ्या प्रमाणात ऊस वाहतूक करण्यात येते. त्यामुळे सुसरी धरणाला जोडून असलेल्या वळणावर वाहनाचा तोल जाऊन अनेक अपघात होत असतात. शहादा-खेतिया रस्त्यावरील सुसरी धरणाला लागून ‘एस’ वळणाची तीव्रता कमी करणे गरजेचे आहे. तीव्र वळणाचा धोका काढून उपाययोजना होणे गरजेचे आहे.