बँकांसोबत मिनी बँकाही गजबजल्या
नंदुरबार : जिल्ह्यातील विविध भागात बँकांमधील गर्दी कमी करण्यासाठी मिनी बँका सुरू करण्यात आल्या आहेत. सध्या बँकांमध्ये विविध वैयक्तिक लाभाच्या योजनांची रक्कम आली असल्याने लाभार्थी बँकांसोबत मिनी बँकांमध्येही गर्दी करीत असल्याचे चित्र आहे.
पाणी योजना निर्मितीचे प्रस्ताव रखडले
नंदुरबार : जिल्हा परिषदेच्या ग्रामीण पाणीपुरवठा विभागाकडे ग्रामीण भागातील नागरिकांच्या पाणी पुरवठ्यासाठी २३ प्रस्ताव देण्यात आल्याची माहिती आहे. या प्रस्तावांवर कारवाई होण्याची अपेक्षा होती. परंतु संपूर्ण उन्हाळा संपूनही प्रस्तावांवर कारवाई करण्यात आलेली नसल्याची माहिती देण्यात आली आहे. जिल्हा परिषद प्रशासनाने याकडे लक्ष देण्याची मागणी करण्यात येत आहे.
खांडबारा ते वाटवी रस्ता धोकेदायक
नंदुरबार : नवापूर तालुक्यातील खांडबारा ते वाटवीदरम्यानचा रस्ता अपघाती ठरत आहे. या रस्त्यावर खडी उखडून मोठमोठे खड्डे पडले आहेत. यातून रस्ता धोकादायक ठरत आहे. रस्त्यावर खड्डे पडले असल्याने रात्री प्रवास करणाऱ्यांचे सर्वाधिक हाल होत आहेत.
तळोद्यात कचऱ्यातील धूळ ठरतेय त्रासदायी
तळोदा : शहरातील चिनोदा चाैफुलीलगत असलेल्या कचरा डेपोचा प्रश्न गेल्या अनेक वर्षांपासून कायम आहे. हा कचरा डेपो रस्त्याच्या कडेला असून त्यातून उडणारी धूळ या भागातील वसाहतींमध्ये जात असल्याने नागरिक त्रस्त झाले आहेत.
करण चाैफुलीवरील खड्डा पुन्हा त्रासदायक
नंदुरबार : शहरातील करण चाैफुलीवर बायपास रोडकडे जाणाऱ्या वळणालगतचा मोठा खड्डा वाहनधारकांसाठी त्रासदायक ठरत आहे. हा खड्डा बुजविण्याची कारवाई करण्यात आलेली नाही. शेवाळी नेत्रंग महामार्गावरील या चाैफुलीवरून मोठ्या संख्येने वाहतूक सुरू असते. या भागातून शहरात येणाऱ्यांची मोठी वर्दळ असते. दरम्यान या ठिकाणी खड्डा पडल्याने अपघात होण्याची शक्यता आहे.
उपाययोजना करण्याची मागणी
नंदुरबार : गुजरात राज्यातील वाका ते नंदुरबारदरम्यान शेवाळी-नेत्रंग महामार्गावर रस्त्याच्या दुतर्फा साईडपट्ट्या भरण्याची मागणी आहे. साईडपट्ट्यांअभावी हा रस्ता अरुंद होत असून, अपघातांची मालिका सध्या या रस्त्यावर सुरू असल्याचे वेळोवेळी समोर येत आहे.
गतिरोधक टाकूनही वाहनांचा वेग कायम
आष्टे : नंदुरबार तालुक्यातील आष्टे येथे नंदुरबार ते साक्रीदरम्यान होणारी भरधाव वेगातील वाहतूक नागरिकांसाठी जीवघेणी ठरत आहे. आष्टे बसस्थानक परिसरात गतिरोधक टाकून भरधाव वेगातील अवजड वाहने येथून मार्गस्थ होत असल्याचे दिसून आले आहे.
नंदुरबारात रस्त्यावर करावी लागते पार्किंग
नंदुरबार : शहरातील स्टेट बँकेच्या मुख्य शाखेबाहेर वाहन पार्किंगसाठी जागा नसल्याने नागरिक त्यांची वाहने थेट रस्त्यावर लावून बँकेची कामे उरकत आहेत. यातून या मार्गावर जाणाऱ्या इतर वाहनांना अडथळा निर्माण होत असून, वाहतूक शाखेकडून समज देऊनही नागरिकांची वाहने रस्त्यावर येत असल्याचे दिसून आले आहे. शहरातील अंधारे चाैक तसेच अमृत चाैकातील बँकेबाहेरही वाहने लावण्यास जागा नसल्याने रस्त्यात वाहने लावली जातात.
सार्वजनिक स्वच्छतागृहे उभारावीत
नंदुरबार : जिल्ह्यातील ग्रामीण भागात ग्रामपंचायतींकडून गेल्या काही वर्षांपूर्वी १४ व्या वित्त आयोगातून सार्वजनिक स्वच्छतागृहे बांधण्यात आली आहेत. ही स्वच्छतागृहे पूर्णपणे उद‌्ध्वस्त झाली असून नव्याने स्वच्छतागृहे बांधण्याची गरज आहे.
पालिकेने शिल्पकृती स्वच्छ करावीत.
नंदुरबार : शहरातील विविध भागांत लावण्यात आलेले पुतळे तसेच शिल्पाकृतींची स्वच्छता करण्याची अपेक्षा व्यक्त करण्यात येत आहे. विविध चाैकांमध्ये पालिकेने सुशोभीकरणांतर्गत शिल्पाकृती उभारल्या आहेत. यांची स्वच्छता करणे गरजेचे आहे.