नवापूर शहरातील बीएसएनएल ऑफिसच्या पुढे धुळे-सुरत राष्ट्रीय महामार्गावर मधोमध एक गुजरात पासिंगच्या कारमध्ये धारदार शस्त्राने वार केलेला एका व्यक्तीचा मृतदेह आढळून आला होता. स्थानिक गुन्हे अन्वेषण शाखा व नवापूर पोलीस ठाण्याचे अधिकारी व अंमलदार यांनी घटनास्थळी भेट देऊन कारची पाहणी केली असता कारच्या मागच्या सीटवर एका इसमाच्या हाता-पायावर व तोंडावर धारदार शस्त्राने वार करून तोंडावर प्लॅस्टिक चिकटपट्टी चिकटविल्याचे दिसून आले. याबाबत सहा. पोलीस निरीक्षक धीरज प्रकाश महाजन यांच्या फिर्यादीवरून नवापूर पोलीस ठाण्यात अज्ञात इसमाच्या खुनाचा गुन्हा नोंदविण्यात आला.
घटनेचे गांभीर्य लक्षात घेऊन पोलीस अधीक्षक महेंद्र पंडित, उप-विभागीय पोलीस अधिकारी सचिन हिरे, स्थानिक गुन्हे अन्वेषण शाखेचे वरिष्ठ पोलीस निरीक्षक देवराम गवळी यांनी तत्काळ घटनास्थळी धाव घेतली. पोलीस अधीक्षक पंडित यांनी घटनास्थळाची बारकाईने पाहणी करून गुन्हा उघडकीस आणण्यासाठी सूचना दिल्या. मयत कोण? त्याला जीवे मारण्याचा उद्देश काय? मारेकरी कोण, या प्रश्नांची उकल करण्याचे आव्हान पोलिसांसमोर होते. मयताच्या खिशात ऑनलाइन जेवणाची ऑर्डर दिल्याची पावती होती व त्या पावतीवर त्याचा मोबाइल नंबर होता. त्यावरून मयताची ओळख पटविण्यात पथकाला यश आले. मयत हा भावेशभाई सी. मेहता (रा. घनश्यामभाई सोसायटी, सुरत, गुजरात) असल्याचे स्पष्ट झाले.
मयत सुरतहून नवापूर येथे का आला? त्याचे मारेकरी कोण? व त्याला का मारण्यात आले, हे प्रश्न पोलिसांपुढे होतेच. पोलिसांनी घटनेच्या आजूबाजूच्या परिसरातील तसेच नवापूर शहरातून जाणाऱ्या राष्ट्रीय महामार्गावर असलेल्या सर्व हॉटेल, लॉजेस, पेट्रोल पंप येथील सी.सी.टी.व्ही. फूटेज तपासले. त्यात १६ जून रोजी नवापूर शहरातील हॉटेल कुणाल येथे मयत व त्यासोबत इतर पाच ते सहा जण हॉटेलमध्ये प्रवेश करीत असल्याचे दिसले. १७ जून रोजी म्हणजेच घटनेच्या दिवशी नवापूर येथील राष्ट्रीय महामार्गावरील हॉटेल उरविशा येथेदेखील ते पाच ते सहा संशयित आरोपी दिसून आल्याने आरोपी निश्चित झाले. मयत हा सुरत येथील असल्याने व मिळालेल्या सी.सी.टी.व्ही. फूटेजवरून पोलीस अधीक्षक महेंद्र पंडित यांनी एक पथक तत्काळ सुरत येथे रवाना करून स्वत: गुन्ह्याबाबत वेळोवेळी माहिती घेत होते.
नंदुरबार पोलीस पथकाने सलग तीन दिवस अहोरात्र मेहनत घेऊन सुरतसारख्या शहरात बातमीदार तयार करून सी.सी.टी.व्ही. फूटेजमध्ये दिसत असलेले संशयित हे सुरत, नवसारी येथे दारूची अवैध तस्करी करणारे व पैसे घेऊन गुन्हा करणारे (सुपारी किलर) असल्याची प्रथमदर्शनी माहिती मिळवली. त्यावरून आरोपींचा शोध घेण्यात येत होता. त्या अनुषंगाने पोलिसांचे अजून एक पथक तयार करून नवसारी गुजरात राज्यात रवाना केले. सुरत येथील पथकाने अथक परिश्रम घेत सी.सी.टी.व्ही. फूटेजमध्ये दिसत असलेला एका आरोपीचे घर शोधून काढले. पथकाने संशयित आरोपीच्या घराच्या आजूबाजूला सलग चार दिवस वेशांतर करून पाळत ठेवत एका संशयित आरोपीला सुरत शहर गुन्हे शाखेच्या मदतीने शिताफीने बेड्या ठोकल्या. ताब्यात घेण्यात आलेल्या संशयित इसमास त्याचे नाव विचारले असता त्याने त्याचे नाव आकाश रमेशभाई जोरेवार (२१, रा. आंबेडकर नगर, सुरत) असे सांगितले. त्यास खुनाबाबत अधिक विचारले असता त्याने त्याच्या इतर साथीदारांची नावे सांगितले. त्यास मयताला मारण्याचा हेतू काय, असे विचारले असता त्याने अवैध दारू तस्करीच्या व्यवसायातील वादातून खून केला असल्याचे सांगितले. त्याप्रमाणे त्याच्या इतर साथीदारांचा शोध घेतला असता २३ जून रोजी गुन्ह्यातील अजून एक आरोपी आकाश अरविंदभाई ओड (२८, रा. अंबिका नगर, सुरत) यास ताब्यात घेण्यात पथकास यश आले.
आरोपींनी गुन्ह्याची कबुली देऊन खून का केला, याबाबत सविस्तर माहिती दिली. ताब्यात घेण्यात आलेल्या दोन्ही आरोपींना नवापूर पोलीस ठाण्याच्या ताब्यात देण्यात आले असून उर्वरित आरोपींचा कसून शोध सुरू आहे.
ही कारवाई पोलीस अधीक्षक महेंद्र पंडित, अपर पोलीस अधीक्षक विजय पवार, उपविभागीय पोलीस अधिकारी सचिन हिरे यांच्या मार्गदर्शनाखाली स्थानिक गुन्हे अन्वेषण शाखेचे वरिष्ठ पोलीस निरीक्षक देवराम गवळी, नवापूर पोलीस ठाण्याचे पोलीस निरीक्षक बाळासाहेब भापकर, सह पोलीस निरीक्षक धीरज महाजन, संदीप पाटील, स्थानिक गुन्हे अन्वेषण शाखेचे पोलीस हवालदार महेंद्र नगराळे, रवींद्र पाडवी, प्रमोद सोनवणे, मुकेश तावडे, जितेंद्र तांबोळी, पोलीस नाईक राकेश वसावे, विशाल नागरे, जितेंद्र ठाकूर, दादाभाई मासुळ, राकेश मोरे, जितेंद्र तोरवणे, मोहन ढमढेरे, पोलीस अंमलदार राजेंद्र काटके यांच्या पथकाने केली.