नंदुरबार : कोरोनाचा प्रादुर्भाव जाणवू लागल्यानंतर वर्षभरात पहिल्यांदाच कोरोना बाधितांच्या संख्येने नंदुरबार जिल्ह्यात हजारी पार करून त्यापुढील एक हजार १५३ आकडा गाठला आहे. यामुळे चिंता व्यक्त करण्यात येत आहे. एकीकडे कोरोना नियंत्रणासाठी जिल्हा प्रशासन प्रयत्न करीत असताना दुसरीकडे काही नागरिकांची बेफिकिरी ही कोरोना पसरण्यास कारणीभूत ठरत असल्याचे जिल्ह्यातील विदारक चित्र आहे. आता लहानसोबतच मोठ्या गावांमध्येही कोरोना आपले हात-पाय पसरू लागला आहे.
नंदुरबार तालुक्यातील पातोंडा, सावळदे, दहिंदुले, सोंगरीपाडा, काकर्दे, नांदरखेडा, धामडोद, कोठली, खर्दे तलवाडे, भोणे, अक्राळे, समशेरपूर, रुमकीतलाव आदी गावात तर नंदुरबार शहरातील कोकणी हिल, तेली मंगल कार्यालय परिसर, घी बाजार, रेल्वे कॉलनी, जगतापवाडी, बाहेरपुरा, विरलविहार, मंगलभवन जवळ, फकिरा शिंदे नगर, खोडाईमाता रोड, सीतानगर या भागातही बाधित आढळले आहेत.
शहादा तालुक्यात ससदे, असलोद, म्हसावद, भागापूर, निंभोरा, वर्दे टेंभे, डोंगरगाव, सोनावल, करजकुपा, शिरुड दिगर, बिलाडी, चिखली कानडी, सजदे, कोंढावद येथे बाधित आढळले आहेत. शहादा शहरात वडनेरे नगर, हंस नगर, दीनदयाल, सौंदर्यसृष्टी कॉलनी, अंबाजी नगर, मीरा नगर, खोलगल्ली, कृष्णकुंज कॉलनी, तापी रेसिडेन्सी तसेच नवापूर तालुक्यातील खांडबारा, पळशी, तर पळसून येथे तब्बल ४३ रुग्ण आढळले आहेत.
तळोदा तालुक्यातील रांझणी येथे दोन, राणीपूर येथे १२, प्रतापपूर येथे सहा, मोहिदा, आमलाड तसेच तळोदा तालुक्यातील मरिमाता मंदिर परिसर, काशिनाथ नगर, मराठे चौक, श्रीरामनगर, यमुनाई नगर, दौलत नगरात बाधित आढळले.
अक्कलकुवा तालुक्यातील वाण्याविहीर, खडकपाणी, मुळीपाडा, सोरापाडा, मोरांबा, रोजकुंड, खापर येथे बाधित आढळले.
धडगाव शहरासह तालुक्यात रोषमाळ, चुलवद, वडफळ्या, हातधुई, फुलगव्हाण, खुंटामोडी येथेही कोरोनाने पाय पसरले आहेत.