दीड लाखाच्या चोरीतील आरोपी एलसीबीने केले जेरबंद

लोकमत न्यूज नेटवर्कनंदुरबार : ब्रिटीश अंकुशविहिर, ता.अक्कलकुवा येथील दीड लाखाच्या चोरीच्या घटनेतील संशयीत दोघांना एलसीबीच्या पथकाने तळोदा येथे अटक केली. त्यांच्या ताब्यातून मुद्देमाल जप्त करण्यात आला आहे.संदीप अरुण तडवी व अजय भामट्या वळवी, दोन्ही रा.बेडापाडा, ता.तळोदा अशी संशयीतांची नावे आहेत. अक्कलकुवा तालुक्यतील ब्रिटीश अंकुश विहिर येथील संजय तडवी यांच्या घरातून चोरट्यांनी १४ मे रोजी रात्री दीड लाख रुपये रोख व तीन मोबाईल चोरून नेले होते.चोरीच्या या घटनेबाबत एलसीबीकडून तपास सुरू होता. नुकतेच पॅरोलवर सोडलेल्या काही चोरट्यांवर एलसीबीची नजर होती. त्यादृष्टीने पाळतही ठेवण्यात आली होती. परंतु त्यातील कुणीही यात सहभागी नसल्याचे स्पष्ट झाल्यावर एलसीबीने दुसरीकडे मोर्चा वळविला.याच दरम्यान, तळोदा येथे दोन युवक महागडे मोबाईल कमी किंमतीत विक्री करीत असल्याची माहिती पोलीस निरिक्षक किशोर नवले यांना मिळाली. त्यानुसार त्यांनी तातडीने पथकाला पाठवलि. तळोद्यातील स्मारक चौकात चॉकलेटी रंगाच्या दुचाकीवर दोन युवक संशयीतरित्या आढळले.त्यांची चौकशी करीत त्यांना ताब्यात घेतले असता त्यांनी संदीप तडवी व अजय वळवी अशी त्यांची नावे सांगितली. त्यांची झडती घेतली असता तीन महागडे मोबाईल त्यांच्याकडे आढळले. त्यांना बोलते केले असता त्यांनी ब्रिटीश अंकुश विहिर येथील चोरीची कबुली दिली. त्यांना अक्कलकुवा पोलिसांच्यात ताब्यात देण्यात आले.त्यांच्याकडून दोन मोबाईल, दुचाकी जप्त करण्यात आली. रोख रक्कमेचीही माहिती काढली जात आहे.ही कारवाई पोलीस अधीक्षक महेंद्र पंडित, अपर अधीक्षक चंद्रकांत गवळी यांच्या मार्गदर्शनाखाली एलसीबीचे निरिक्षक किशोर नवले, उपनिरिक्षक योगेश राऊत, हवालदार दिपक गोरे, सुनील पाडवी, मोहन ढमढेरे, विजय ढिवरे यांच्या पथकाने केली.