रेवानगर ग्रामपंचायत कारभारात बाहेरील व्यक्तींचा हस्तक्षेप

तळोदा तालुक्यातील रेवानगर ग्रामपंचायतीच्या कारभारात बाहेरील व्यक्तींचा जास्तीच्या हस्तक्षेपाबाबत पं.स. सदस्य दाज्या पावरा व ग्रा.पं. सदस्य तेहरसिंग पावरा यांनी तहसीलदार गिरीष वाखारे यांच्याकडे लेखी तक्रार केली आहे. त्यात म्हटले आहे की, ग्रामपंचायतीच्या मासिक सभेत सदस्यांना न बसवता सत्तेबाहेरील कार्यकर्त्यांना बसवितात. एवढेच नव्हे कामकाजात भाग घेऊन ढवळाढवळदेखील करतात. शिवाय बेकायदेशीर कामे करण्यास भाग पडतात. याचे सरपंच व ग्रामसेवक अवलोकन करीत नाही म्हणजेच त्यांची एकप्रकारे मूकसंमतीच आहे. विविध विषयांवर हेच व्यक्ती मध्यस्थी करतात. १८ मे रोजी पार पडलेल्या सभेत ग्रामपंचायत सदस्य तेहरसिंग पावरा यांनी आपल्या प्रभागातील विविध समस्या व अडचणी लेखी स्वरूपात सादर केल्या होत्या. परंतु सदस्य नसलेले चिमा पावरा, नाथ्या पावरा, डेमशा पावरा यांनी त्याची खिल्ली उडविली. ‘तुम्ही कितीही अर्ज द्या, तुमची कामे होऊ देणार नाहीत’ असे म्हणून अपमानास्पद वागणूक दिली होती. यावर सरपंचांनी काहीच दखल घेतली नाही, असा आरोप त्यांनी केला आहे. कोरोनाबाबत गावातील लोकांमध्ये नकारात्मकता आहे. त्यावर जनजागृती केली जात नाही. शिवाय गावातील बहुसंख्य हातपंप नादुरुस्त झाले आहे. त्यामुळे पाणीटंचाईही निर्माण झाली आहे. महामारीमुळे ग्रामसभा झालेली नाही. मागील चार-पाच महिन्यात मासिक सभा झालेल्या आहेत. त्या सभांमध्ये सदस्य नसलेल्यांना बसविण्यात येत आहे. अशा बेकायदेशीर प्रकाराला कायमस्वरूपी आळा घालावा, अशी मागणी पंचायत समिती सदस्य दाज्या पावरा, तेहरसिंग पावरा, पिंटू पावरा, दुरशा पावरा, बारक्या पावरा, लेहाऱ्या पावरा, मिनेश पावरा, रुमाल्या पावरा यांनी केली आहे.