अपघातातील मयत व जखमींना मदतीऐवजी मारहाण

लोकमत न्यूज नेटवर्कशहादा : तालुक्यातील राणीपूर गावात मरीमाता मंदिराजवळ शनिवारी सायंकाळी चार वाजेच्या सुमारास मोटारसायकल व अज्ञात चारचाकी वाहनाच्या झालेल्या अपघातात एका युवकाचा मृत्यू तर दुसरा जखमी झाल्याची घटना घडली. म्हसावद पोलीस ठाण्यात या अपघाताची नोंद करण्यात आली आहे. दरम्यान, जखमींनी संबंधित चारचाकी वाहन चालकाला दवाखान्यात नेण्याची विनंती केली. मात्र जखमींना दवाखान्यात न नेता उलट त्यांना या वाहनातील युवकांनी मारहाण केली. त्यामुळे पोलिसांनी या वाहनाचा व त्यातील युवकांचा शोध घेऊन कडक कारवाई करण्याची मागणी होत आहे.याबाबत माहिती अशी की, शहादा शहरातील कुकडेल भागात राहणारा हर्षल नामदेव जाधव (१९) व त्याचे नातेवाईक धुळे येथील राज्य राखीव पोलीस दलातील कर्मचारी भूषण मराठे हे शनिवारी मोटारसायकलीने (क्रमांक एम.एच.१८ डीझेड-७६५२) तोरणमाळ येथून शहाद्याकडे येत होते. राणीपूर गावाकडे जाणाऱ्या एका अज्ञात वाहनाने मरीमाता मंदिरासमोर मोटारसायकलला धडक दिली. या अपघातात मोटारसायकलीवरील हर्षल जाधव याच्या डोक्याला व छातीला मार लागला. या वेळी त्याच्यासोबत असलेले त्याचे नातेवाईक भूषण मराठे यांनी त्या वाहनचालकाला हर्षल यास रुग्णालयात हलवण्याची विनंती केली.मात्र या वाहनातील काही युवकांनी उतरून हर्षल जाधव व भूषण मराठे यांना मारहाण करून त्यांनी तेथून पळ काढला. तास-दीड तास रस्त्यावर कुठलेही वाहन न आल्यामुळे हर्षल जाधव याचा उपचाराअभावी जागीच मृत्यू झाला. सायंकाळी घटनेची माहिती मिळताच म्हसावद पोलीस ठाण्याचे प्रभारी पोलीस निरीक्षक अनिल पवार व पोलीस कर्मचाऱ्यांनी घटनास्थळी जाऊन दोघांना म्हसावद ग्रामीण रुग्णालयात दाखल केले. रुग्णालयातील वैद्यकीय अधिकाºयांनी हर्षल जाधव यास मयत घोषित केले.या घटनेसंदर्भात जाधव कुटुंबातील लोकांना व नातेवाईकांना माहिती मिळताच त्यांनी ग्रामीण रुग्णालयाकडे धाव घेतली. रविवारी सकाळी पोलीस आरोपींना अटक करत नाही तोपर्यंत मयताचे प्रेत उचलले जाणार नाही. त्यामुळे पोलीस प्रशासनासमोर एकच प्रश्न निर्माण झाला होता. बºयाच वेळानंतर शहादा उपविभागीय पोलीस अधिकारी पुंडलिक सपकाळे यांनी भ्रमणध्वनीद्वारे पोलीस निरीक्षक अनिल पवार यांच्याशी संपर्क करून घटनेबाबत माहिती घेतली. त्यानंतर पोलीस निरीक्षक अनिल पवार यांनी मयताच्या नातेवाईकांना आरोपीविरुद्ध कारवाईचे आश्वासन दिल्यानंतर प्रेत ताब्यात घेऊन दुपारी दोन वाजेच्या सुमारास शहादा हर्षलच्या मृतदेहावर अंत्यसंस्कार करण्यात आले.