नंदुरबार : सोशल मीडियावर फेक अकाऊंट तयार करण्याचे प्रकार मोठ्या प्रमाणावर वाढले आहेत. याबाबत तक्रारी येत असल्या तरी गंभीर प्रकार नसल्याने गुन्हे दाखल करण्यास संबंधित पुढे येत नाहीत. असे असले तरी नंदुरबार सायबर सेल सक्रिय असून लागलीच दखल घेऊन तक्रारींचे निरसन केले जात आहे.
नंदुरबार पोलीस दलात स्वतंत्र सायबर सेल आहे. या ठिकाणी प्रशिक्षित अधिकारी व कर्मचारी नियुक्त करण्यात आले आहेत. अनेक गुंतागुंतीचे गुन्हे व तक्रारींचेदेखील निरसन करण्यात आले आहे. त्यामुळे नागरिकांचा विश्वास वाढू लागला आहे. गोपनियतेलादेखील या ठिकाणी प्राधान्य दिले जात असल्याने नागरिक विश्वासाने सायबर सेलमध्ये तक्रारी करण्यास धजावत आहेत.
गेल्या एक ते दीड वर्षापासून सायबर सेलकडे फेसबुक, इन्स्टाग्रामवर बनावट अकाऊंट ओपन करणे, बनावट नावाने फ्रेंड रिक्वेस्ट येणे, पैशांची मागणी होणे यासह इतर फसवणुकीचे प्रकाराच्या तक्रारी येत आहेत. त्यात महिलांप्रमाणे पुरुषांचा देखील सर्वाधिक तक्रारी असल्याचे चित्र आहे.
नंदुरबार सायबर सेलकडून जनजागृती...
n सोशल मीडियावरील फेक अकाऊंट कसे बंद करावे याविषयी सविस्तर माहिती असलेला व्हीडीओ नंदुरबार सायबर सेलने तयार केला आहे.
n पोलीस अधीक्षक महेंद्र पंडित, अपर पोलीस अधीक्षक विजय पवार, पोलीस निरीक्षक रवींद्र कळमकर यांच्या मार्गदर्शनाखाली सायबर सेलचे पोलीस कर्मचारी विविध माध्यमातून लोकांमध्ये जनजागृती करीत आहेत.
n ‘हाऊ टू रिपोर्ट फेक फेसबुक ॲण्ड इन्स्टाग्राम अकाऊंट’ असे सर्च केले तरी विविध व्हिडिओ पाहता येऊ शकतो.
n सोशल मीडियाचा वापर करणाऱ्या युजर्सनी असे व्हिडिओ पाहून फेक अकाऊंट बंद करण्याची प्रोसेस समजून घ्यावी. तसेच मित्रांनाही लिंक पाठवून समजावून सांगावे. घाबरून न जाता तक्रार दाखल करावी, असे आवाहन पोलीस निरिक्षक रवींद्र कळमकर यांनी केले आहे.