रजाळे येथे अतिसार पंधरवाडा विषयी मार्गदर्शन

अध्यक्षस्थानी सरपंच रेखा पाटील, पोलीस पाटील वंदना पाटील उपस्थित होत्या. याप्रसंगी जमलेल्या सर्व पालकांना अंगणवाडी सेविका सपना पाटील यांनी अतिसार पंधरवाडा नियंत्रण कार्यक्रमाविषयी मार्गदर्शन केले. या वेळी अंगणवाडी सेविका पाटील यांनी महिलांना १५ ते ३० जुलै या पंधरवड्यात अतिसाराची लागण होऊ नये म्हणून लहान बालकांची विशेष काळजी घ्यावी. तसेच आपल्या परिसरात स्वच्छता राखावी, वैयक्तिक स्वच्छता, सांडपाण्याची व्यवस्था, आठवड्यातून एक दिवस कोरडा दिवस म्हणून पाळणे तसेच पाणी उकळून पिण्याविषयी माहिती देऊन उपस्थित महिलांना जनजागृती केली. तसेच शून्य ते सहा वर्ष बालकांची रोग प्रतिकार शक्ती कमी असते, अशा बालकांची विशेष काळजी घेण्याबाबत ही मार्गदर्शन करण्यात आले. तसेच गरोदर मातांनी वेळेवर आहार घ्यावा व लहान बालकांची ही काळजी घ्यावी. वेळेवर आहार देण्यात यावा या विषयी उत्कृष्ट मार्गदर्शन केले. अंगणवाडी सेविका छाया पाटील यांनी उपस्थित महिलांना गाण्याच्या माध्यमातून जेवणाच्या आधी साबणाने स्वच्छ हात धुवावे, तसेच कोरोना नियमांचेही पालन करावे आदींबाबत जनजागृती केली. कार्यक्रमाप्रसंगी गरोदर मातांना सरपंच रेखा पाटील यांच्या हस्ते बेबी किटचे वाटप करण्यात आले. तसेच नयना मंगा भिल व कनिका खुशाल पाटील या दोन्ही चिमुकलीचा अर्धवार्षिक वाढदिवस असल्याने त्यांचा वाढदिवस अंगणवाडी केंद्रात मान्यवरांच्या हस्ते साजरा करण्यात आला आहे. कार्यक्रमासाठी मदतनीस साधना पाटील यांनी परिश्रम घेतले. या कार्यक्रमाला गावातील गरोदर माता, स्तनदा माता व शून्य ते सहा वर्ष बालकांच्या माता मोठ्या संख्येने उपस्थित होते.