तोरणमाळ हे थंड हवेचे निसर्ग सौंदर्यस्थळ असून, येथे पर्यटकांची मोठी गर्दी होत होती. यामुळे अशा अतिदुर्गम भागात कोरोनाचा संसर्ग मोठ्या प्रमाणावर वाढत असल्याने भीतीचे वातावरण निर्माण झाले होते. त्यामुळे तोरणमाळ ग्रामपंचायत तसेच म्हसावद पोलीस ठाणेअंतर्गत संयुक्त बैठक बोलावून शनिवार व रविवार कडक लॉकडाऊन तसेच आठवडे बाजार बंदचा निर्णय घेण्यात आला होता. त्यामुळे पर्यटकांना तोरणमाळ पर्यटन स्थळावर येण्यास बंदी होती. सध्या कोरोनाचा प्रादुर्भाव कमी झाल्याने जनजीवन हळूहळू पूर्वपदावर येत आहे. घरात बसून राहिलेल्या पर्यटकांना थंड हवेचे ठिकाण असलेले तोरणमाळ पर्यटनस्थळ अनलॉक झाल्याने पर्यटक हजेरी लावत असल्याचे चित्र दिसून येत आहे.
वातावरण आल्हाददायक
सध्या पावसाळ्याला सुरुवात झाली आहे. परंतु १५ दिवसांच्या कालावधीत काही प्रमाणातच पावसाने हजेरी लावली. यामुळे तोरणमाळ परिसरातील निसर्ग फुलला असून, आल्हाददायक वातावरण निर्माण झाले आहे. यात शनिवारी व रविवारी धुक्याच्या वातावरणाने अधिक भर पडली होती. त्यात पर्यटक मनसुराद आनंद लुटताना दिसून आले.
व्यवसाय वाढले
गेल्या दीड वर्षापासून कोरोनाच्या प्रादुर्भावामुळे तोरणमाळ पर्यटन स्थळांवरील व्यावसायिकांना आर्थिक संकटांना सामोरे जावे लागले होते. त्यामुळे अनेक व्यावसायिकांवर उपासमारीची वेळ निर्माण झाली होती. सध्या कोरोनाचा प्रादुर्भाव कमी झाल्याने पर्यटक पुन्हा तोरणमाळ पर्यटन स्थळाकडे वळू लागल्याने तोरणमाळ येथील व्यावसायिकांना पुन्हा ‘अच्छे दिन’ येत आहेत.