व्हॅाट्‌सअप स्टेटसवरून दोन गटात मारहाण, पाच जणांना अटक २७ दुचाकी जप्त

याबाबत पोलिस सूत्रांनी दिलेल्या माहितीनूसार, दोंडाईचा रस्त्यावरील हॉटेल कृषी महाविद्यालयाच्या पुढे २० रोजी सायंकाळी साडेसात वाजेच्या सुमारास व्हॉटसअप स्टेटसवरुन दोन गटात वाद निर्माण झाला. दोन्ही गटातील युवकांनी हातात लाठ्याकाठ्या घेवून दशहत पसरविण्याच्या उद्देशाने एकमेकांच्या दुचाकींची तोडफोड केली. यात सुमारे २५ ते ३० हजार रुपयांचे नुकसान झाले आहे. यावेळी दोन्ही गटातील संशयितांनी गैरकायद्याची मंडळी जमवून आपापसात सामजिक अंतर न ठेवता नंदुरबार जिल्हाधिकारी यांनी कोरोना प्रादुर्भाव रोखण्यासाठी लागू केलेल्या संचारबंदी तसेच जमावबंदी आदेश पारित केलेले असतांना नियमांचे उल्लंघन केले. याप्रकरणी नंदुरबार शहर पोलिस ठाण्यात हवालदार रविंद्र पवार यांच्या फिर्यादीवरुन दोन्ही गटातील सुमारे ६० जणांच्या जमावाविरोधात गुन्हा दाखल करण्यात आला आहे. दरम्यान, याप्रकरणी संशयित जितेंद्र मंगू ठाकरे, अशोक श्रावण नाईक, सुरज मगन भील, नरविंद भिवा ठाकरे, अर्जुन अण्णा ठाकरे (सर्व रा.नंदुरबार) यांना अटक करण्यात आली आहे. उर्वरित संशयितांचा शोध सुरु आहे. पोलिसांनी घटनास्थळी असणार्‍या २७ दुचाकी जप्त केल्या असून शहर पोलिस ठाण्याच्या आवारात ठेवण्यात आल्या आहेत.