नंदुरबार : कोरोनानंतर रुग्णांमध्ये उद्‌भवणाऱ्या बुरशीजन्य इन्फेक्शनची जिल्ह्यातील पहिली शस्त्रक्रिया नंदुरबारात करण्यात आली. ६२ वर्षे वयाच्या वृद्धेवर ही यशस्वी शस्त्रक्रिया करण्यात आली असून, त्यासाठी पाच डॅाक्टरांचे पथक तैणात करण्यात आले होते.
कोरोनातून बरे झालेल्या बऱ्याच रुग्णांना म्यूकर मायकोसीस या आजाराला सामोरे जावे लागत आहे. नंदुरबारात अशाच एका ६२ वर्षे वयाच्या वृद्धाला ही समस्या सतावत होती. नाकातील सायनसमध्ये व डोळ्यांच्या सभोवतालच्या भागात बुरशीजन्य इन्फेक्शन आढळून आले. डोळा व मेंदूच्यामधील सायनसमध्ये त्याचे प्रमाण अधिक होते. त्यासाठी तातडीने शस्त्रक्रिया करणे आवश्यक असल्याने पाच डॅाक्टरांची टिम तयार करण्यात आली. त्यात डॉ. विनय पटेल, डॉ. किरण जगदेव, डॉ. दिनेश पाटील, डॅा. यशपाल जावरे व डॅा.तेजस्वीनी कोळी यांचा त्यात समावेश होता. अत्याधुनिक एण्डोस्कोपी पद्धतीने ऑपरेशन करण्यात आले. अत्याधुनिक कॅाबलेटर व मायक्रोडीब्रायडरद्वारे डोळ्यांच्या बाजूस असणारे फंगल इन्फेक्शन काढण्यात आले. यामुळे वृद्धेच्या डोळ्यात इन्फेक्शनचा प्रादुर्भाव होऊ शकला नाही. त्यामुळे त्यांचा डोळा वाचला. त्यामुळे डॅाक्टरांच्या टिमने तसेच रुग्णाच्या नातेवाइकांनीदेखील समाधान व्यक्त केेले.
फंगल इन्फेक्शनची लक्षणे आढळल्यास तातडीने सायनसचा सीटी स्कॅन व डोळ्यांचा एमआयआर करून घेणे आवश्यक आहे. त्यानुसार आजाराचे निदान करून उपचार किंवा शस्त्रक्रियेचा निर्णय घेता येऊ शकतो. परिणामी, डोळे निकामी होण्याचा धोका टळू शकतो. असे असले तरी कोरोनातून बरे झालेल्या सर्वांनाच हा आजार होऊ शकतो असे नाही, त्यामुळे घाबरून जाण्याचे कारण नाही.
-डॅा.राजेश कोळी, कान, नाक, घसा तज्ज्ञ, नंदुरबार.