धुळे-सुरत राष्ट्रीय महामार्गावर कोंडाईबारी घाटाच्या पायथ्याशी तामिळनाडूहून सुरतकडे ट्रक (क्रमांक टी. एन.५२ आर- ३७६६) कपड्याने भरलेल्या गाठी घेऊन जात असताना, ट्रकचालकाचा भरधाव वेगाने धावणाऱ्या वाहनावरील ताबा सुटला. अशातच हा मालट्रक महामार्गावरील दुभाजकावर आदळून उलटला. भरदुपारी उन्हात हा ट्रक उलटल्याने घर्षण होऊन ट्रकने क्षणात पेट घेतला. ट्रकमध्ये कापडाच्या गाठी असल्याने मालट्रकने पेट घेऊन आगीने रौद्ररूप धारण केले.
या घटनेची माहिती मिळताच महामार्ग पोलीस मदत केंद्रावरील सहायक पोलीस निरीक्षक राहुल शेजवळ, पोलीस उपनिरीक्षक रवींद्र लोंढे, पो.कॉ. दीपक चौधरी, राकेश भामरे, महेश बच्छाव तसेच विसरवाडीचे पोलीस पथक यांनी घटनास्थळी धाव घेतली. त्यांनी ट्रकमध्ये अडकलेले चालक व सहचालक यांना ट्रकमधून बाहेर काढले व विसरवाडी ग्रामीण रुग्णालयात दाखल केले. यातील चालक सिंधील मनी (वय २५, रा. सेलम, तामिळनाडू) हा गंभीर भाजला गेल्याने त्यास नंदुरबार जिल्हा रुग्णालयात पुढील उपचारासाठी हलविण्यात आले. मात्र तेथे उपचार घेत असताना त्याची प्राणज्योत मालवली; तर सहचालक गंभीर जखमी आहे. आग आटाेक्यात आणण्यासाठी नवापूरहून अग्निशमन बंबाला पाचारण करण्यात आले. आगीवर नियंत्रण मिळविण्यात आले, मात्र तोपर्यंत संपूर्ण ट्रक जळून खाक झाला होता. या अपघातात लाखो रुपयांचे नुकसान झाले. यावेळी रस्त्याच्या दोन्ही बाजूला वाहनांच्या रांगा लागल्या होत्या. याबाबत विसरवाडी पोलीस ठाण्यात अपघाताची नोंद करण्यात आली आहे. पुढील तपास विसरवाडी पोलीस करीत आहेत.