विलगीकरणही बंदच
नंदुरबार : जिल्ह्यातील रुग्णसंख्या घटली असल्याने दिलासा मिळत आहे. यातून ग्रामीण भागात सुरू करण्यात आलेले विलगीकरण कक्षही रिकामे आहे. दक्षता म्हणून यातील काही कक्ष सुरू असून त्याठिकाणी माध्यमिक व प्राथमिक शाळांचे शिक्षक दिवसभर थांबत आहेत. हे कक्षही लवकरच बंद होणार आहे.
अन्न व औषध प्रशासनाने लक्ष द्यावे
नंदुरबार : तालुक्यातील काही भागात जीवनावश्यक वस्तूंचे दर अचानक वाढीस लागल्याच्या तक्रारी अद्यापही होत आहेत. या पार्श्वभूमीवर अन्न व औषध प्रशासनाने याकडे लक्ष देण्याची मागणी आहे. खाद्यतेल, डाळी यासह इतर पदार्थांचे दर पाच ते दहा रुपयांनी वाढवण्यात आले आहेत. ही दरवाढ नेमकी कोणाच्या आदेशाने केली हे किराणा दुकानदार सांगत नाहीत. यातून गोरगरिबांची पिळवणूक होत असल्याची माहिती आहे.
चारा वाहतूक वाढली
नंदुरबार : जिल्ह्यातील तळोदा व शहादा तालुक्यातून कोरडा आणि हिरवा चारा खरेदी करुन नागरिक नेत आहेत. नंदुरबार तालुक्यात यंदाही चारा टंचाई आहे. पशुपालकांकडे जूनपर्यंतचा चारा असल्याने त्यांच्याकडून चारा खरेदी करण्यात येत असल्याची माहिती देण्यात आली आहे.
डिस्टन्सिंगची गरज
तळोदा : शहरातील विविध भागात भाजीपाला विक्रेते व्यवसाय करू लागले आहेत. कोविड नियमांनुसार त्यांची बैठक व्यवस्था असली तरी काही ठिकाणी सोशल डिस्टन्सिंग होत नसल्याचे दिसून आले आहे. याकडे नगरपालिका प्रशासनाने लक्ष देत व्यावसाियकांना माहिती देणे गरजेचे आहे.
विसरवाडी येथे केंद्र सुरू करावे
नंदुरबार : नवापूर तालुक्यातील विसरवाडी ग्रामीण रुग्णालयात रॅपिड ॲन्टिजन चाचणी व स्वॅब संकलन केंद्र नियमित सुरू करावे अशी मागणी आहे. या नियमित केंद्रामुळे विसरवाडी परिसरातील ४० खेड्यापाड्यातील नागरिकांची सोय होणार आहे. नागरिकांना रॅपिड टेस्टसाठी सध्या पथकाची वाट बघावी लागत आहे. रॅपिड टेस्टसाठी नागरिकांना नंदुरबार किंवा नवापूर येथे जावे लागत आहे.
टाॅवर सुरू करावा
मोलगी : सातपुड्याच्या दुर्गम भागातील मोलगी ता. अक्कलकुवा परिसरातील मोबाईल टाॅवर बंद आहेत. ते तडीने सुरु करण्याची मागणी आहे. लाॅकडाऊनमुळे सध्या इंटरनेटचा वापर वाढला आहे. परंतु टाॅवर बंद असल्याने नागरिकांना माहिती मिळण्यास अडचणी येत आहेत.
जनजागृतीला प्रतिसाद
धडगाव : तालुक्यातील विविध भागात लसीकरणात वाढ व्हावी यासाठी जनजागृती सुरु करण्यात आली आहे. या जनजागृतीमुळे लसीकरण वाढत असून मास्कचा वापरही नागरिक करु लागले आहेत. गेल्या काही काळात मास्कचा वापर न करणाऱ्यांवर कारवाई व दंड झाल्याने नागरिक दक्षता घेत आहेत.
शेतीकामांना गती
शनिमांडळ : नंदुरबार तालुक्याच्या पूर्व भागातील शनिमांडळ परिसरातील गावांमध्ये शेतीकामे सुरु आहेत. खरीपपूर्व पिकांच्या पेरणीसाठी शेतकरी तयारी करत आहेत. या भागात अनेकांनी भाजीपाला पिकांची लागवड केली आहे. यातून मजुरांना रोजगार मिळत आहे.
लसीकरण शिबिर
शहादा : तालुक्यातील वाघर्डे प्राथमिक आरोग्य केंद्रांतर्गत विविध गावांमध्ये लसीकरण शिबिरे घेण्यात येत आहेत. मोहिमेसाठी डॉ.बी.डी.निकुंभ यांच्या आरोग्य केंद्राचे कर्मचारी परिश्रम घेत आहेत. वाघर्डे परिसरातील गावांमध्ये ग्रामपंचायतींकडून जनजागृती करुन लसीकरणावर भर दिला जात आहे.