शहादा प्रकाशा रस्त्यावर धुळीचे साम्राज्य

लोकमत न्यूज नेटवर्कशहादा : कोळदे ते खेडदिगर रस्ता रूंदीकरणाचे काम सुरू असून, लॉकडाऊनमुळे ते बंद आहे. शहादा ते प्रकाशा रस्त्यावरी डामरखेडा गावाजवळ रस्ता रूंदीकरणासाठी उखडण्यात आला आहे. मात्र त्यानंतर कामबंद झाल्याने रस्त्यावरील धुळीमुळे वाहनधारकांना अडचणींचा सामना करावा लागत आहे.रस्त्यावरील मातीमुळे प्रचंड प्रमाणात धूळ उडत असल्याने दुचाकीधारकांना नाहक त्रास सहन करावा लागत आहे. तसेच धुळीमुळे समोरील वाहन दिसत नसल्याने दुचाकीस्वारांमध्ये अपघाताच्या घटनाही घडत असून, संबंधित ठेकेदाराने या मातीच्या रस्त्यावर पाणी शिंपडण्याची मागणी वाहनधारकांकडून होत आहे.शहादा ते प्रकाशा दरम्यानच्या कच्च्या रस्त्यावरून मोठे व अवजड वाहन गेल्यास प्रचंड धूळ उडते या धुळीमुळे समोरचे काहीच दिसत नसल्याने दुचाकीस्वारांचे अपघात होत आहे.डामरखेडा गावातून जाणारा रस्ता कोरल्यामुळे गावामधील रस्त्यावर प्रचंड माती असल्याने वाहनांच्या वर्दळीमुळे मोठ्या प्रमाणावर धूळ उडत आहे. ही धूळ रस्त्याच्या आजूबाजूला असलेल्या घरांमध्ये जात असल्यामुळे नागरिकांनाही या धुळीचा प्रचंड त्रास सहन करावा लागत आहे. दिवसभर अवजड वाहनांची वर्दळ राहत असल्याने उडणारी धूळ सरळ घरात येते. त्यातच गावातील नागरिकांना सार्वजनिक ठिकाणी बसणेदेखील मुश्कील झाले आहे.या धुळीमुळे रस्त्यावरून नियमित ये-जा करणाऱ्यांना खोकला, त्वचारोग आदींना सामोरे जावे लागत आहे. ज्याठिकाणी मातीचा रस्ता आहे. तेथे संबंधित ठेकेदाराने नियमित पाणी शिंपडण्याची गरज असून, रस्ता रूंदीकरणाच्या कामाला गती देऊन हे काम लवकर पूर्ण करावे, अशी मागणी त्रस्त वाहनधारक व गावकऱ्यांकडून करण्यात येत आहे.