याबाबत सविस्तर वृत्त असे की, संबंधित विभागाने याकडे अक्षम्य दुर्लक्ष केल्याने येथील रहिवाशांना आकडा टाकून वीज घेण्याची वेळ आली आहे. यामुळे वीज मीटर ग्राहक व येथील रहिवाशांमध्ये अनेकदा या कारणावरून वाददेखील उद्‌भवत आहेत. नंदुरबार शहराजवळच असलेल्या भोणे फाट्यावरील घरकूल वस्ती सर्व्हे नंबर ३०० मध्ये दोन वर्षांपासून वीजपुरवठा नसल्याने येथील रहिवाशांना अनेक समस्यांचा सामना करावा लागत आहे. रात्रीच्या सुमारास विंचू, साप आदी विषारी प्राणी निघत असल्याने रहिवाशांचा जीव धोक्यात आला आहे. या घरकूल वसाहतीला लागून असलेल्या वीज तारांवर येथील रहिवाशांना आकडा टाकून रात्र काढावी लागत आहे. विद्युत तारांवर आकडा टाकत असल्याने एकाच विद्युत रोहित्रावर अधिक भार होत असल्याने त्या परिसरातील वीजपुरवठा वारंवार खंडित होत असून या कारणावरून मीटरधारक ग्राहक व घरकूलमधील रहिवाशांमध्ये अनेकदा वाद निर्माण होत आहेत. मंगळवारी येथील रहिवाशांनी वीज तारांवर आकडा टाकल्याने मीटरधारक ग्राहक व येथील रहिवाशांमध्ये या कारणावरून शाब्दिक बाचाबाची झाली. वेळीच नंदुरबार शहर पोलीस ठाण्याचे पोलीस पथक दाखल झाल्याने पुढील अनर्थ टळला. यावेळी येथील रहिवाशांनी विविध समस्या मांडल्या. वीजपुरवठा नसल्याने रात्र अंधारातच काढावी लागते. वीजपुरवठा व्हावा यासाठी येथील रहिवाशांनी नगरपालिका व महावितरण कंपनीच्या अभियंत्यांनाही वेळोवेळी निवेदन देऊनही याकडे संबंधित विभागाने पूर्णत: दुर्लक्ष केल्याने नाराजी व्यक्त होत आहे.
भोणे फाट्यावरील घरकूल वसाहतीत सध्या १३० हून अधिक कुटुंब रहिवासी आहेत; मात्र या दुर्लक्षित घरकूल वसाहतीत विविध समस्या असून त्या सोडविण्यात याव्यात, अशी मागणी रहिवाशांनी केली आहे. यावेळी भिका महादू बाबरे, गुड्डू सैयद नुरअली, मनीषा राजेंद्र गुरव, हसनूरबी हमेतखाँ चिखलीकर, वर्षा नवनीत पाटील, मंगलाबाई माळी, शबानोबानो, सुभानखॉ, शेख आरिफ शेख अब्दुल, अकीमखा पठाण आदी नागरिकांनी विविध समस्या मांडल्या आहेत.
वीज नसल्याने सण-उत्सव अंधारातच साजरे करावे लागतात. संबंधित वीज वितरण व नगरपालिकेला अनेकदा निवेदने दिली आहेत; मात्र याची अद्यापही दखल घेण्यात आली नाही. अंधार असल्याने आम्ही शेजारच्या कॉलनीतील विद्युत तारांवर आकडी टाकत असल्याने यामुळे विद्युत रोहित्रावर अधिकचा भार होत असल्याने वीजपुरवठा खंडित होतो. यामुळे या परिसरातील ग्राहक व आमच्यात या कारणावरून वाद उद्‌भवत असतो. संबंधित विभागाने वेळीच वीजपुरवठा करावा.
-गुड्डू सैयद नुरअली, रहिवासी, भोणेफाटा घरकूल वसाहत