मोबाईल हॅकरकडून ‘कोरोना’चा फायदा

लोकमत न्यूज नेटवर्कनंदुरबार : कोरोना व्हायरस आणि त्याची सर्वसामान्यांनी घेतलेली धास्ती याचा फायदा आता मोबाईल हॅकर घेवू लागले आहेत. कोरोना व्हायरस मॅप हा मालवेअरच्या माध्यमातून लींक पाठवून मोबाईल डाटा चोरण्याचा प्रयत्न होत आहे. दरम्यान, सोशल मिडियाद्वारे कोरोनासंदर्भात अफवा व चुकीची माहिती पसरविल्यास गुन्हे दाखल करण्यात येणार असल्याचा इशारा पोलीस अधीक्षांनी दिला आहे.याबाबत जिल्हा पोलीस दलाने केलेल्या आवाहनानुसार, मोबाईल किंवा संगणकामध्ये लिंकच्या स्वरूपात पाठविण्यात आलेली कोरोना व्हायरस मॅप या लिंकला क्लिक किंवा ओपन करण्याचा प्रयत्न करू नये. सरळ अशी लिंक डिलेट करावी. कोरोना व्हायरसबाबत सोशल मिडियावर अफवा किंवा चुकीची माहिती प्रसारीत केल्यामुळे भारतासह राज्यात विविध ठिकाणी गुन्हे दाखल करण्यात येवून अफवा परसरविणाऱ्यांविरुद्ध कडक कायदेशीर कारवाई करण्यात आली आहे. समाजातील काही विकृत व गुन्हेगारी प्रवृत्तीचे लोक मुद्दाम सोशल मिडियाच्या माध्यमातून खोट्या बातम्या किंवा अफवा पसरवून नागरिकांमध्ये भितीचे व दहशतीचे वातावरण निर्माण करीत आहे. त्यामुळे कोणीही सोशल मिडियावर कोरोना व्हायरसबाबत अफवा किंवा चुकीची माहिती प्रसारीत करू नये. जिल्ह्यातील अधिकृत नियंत्रण कक्षाकडूनच माहिती घ्यावी.जिल्हा सायबर सेलद्वारे जिल्ह्यातील सोशल मिडियाच्या हालचालींवर बारकाईने लक्ष ठेवले जात आहे. अफवा किंवा चुकीची माहिती प्रसारीत केल्यास कायदेशीर कारवाई करण्यात येईल. चुकीची आणि नागरिकांमध्ये गोंधळ उडेल अशी माहिती कुणी प्रसारत करीत असेल तर जवळच्या पोलीस ठाण्यात संबधीताविरुद्ध तात्काळ तक्रार करावी. कोरोना संदर्भात अधिकृत माहिती व बातम्यांवरच विश्वास ठेवा असे आवाहनही जिल्हा पोलीस अधीक्षकांतर्फे करण्यात आले आहे.