लाखाणी पार्कमधील मुस्लीम बांधवांचा रमजानचा महिना सुरू आहे. त्यात पाण्यासाठी मुस्लिमांचे हाल होत आहेत. खास करून मुस्लीम महिलांना मनस्ताप सहन करावा लागत आहे.
तहानलेल्या पावलांनी लाखाणी पार्कमधील मुस्लिम महिलांनी नगरपालिका व तहसील कार्यालयात जाऊन पाणीटंचाई दूर करण्यासंदर्भात निवेदन दिले. यावेळी एजाज शेख, जयंतीलाल अग्रवाल, प्रणव सोनार, स्वप्निल मिस्त्री, अनिल सोनार, शाहरूख खाटीक, विवेक सोनार, जितेंद्र आहिरे आदी उपस्थित होते.
साहेब... हमारा रोजा चालू है, पाणी मिल नही रहा है, हमे पाणी दो, अल्लाह आपको दुवा देगा, अशी मुस्लीम महिलांनी हाक दिली. यावर तहसीलदार मंदार कुलकर्णी यांनी तत्काळ उपाययोजनांबाबत नगरपालिकेला आदेश दिले. यावेळी भाजप तालुकाध्यक्ष भरत गावीत यांनी पालिकेच्या ठेकेदाराला काळ्या यादीत टाकण्याची मागणी केली. एजाज शेख यांनी देखील नगरपालिका प्रशासनावर नाराजी व्यक्त केली. भरत गावीत व परिसरातील रहिवासी परवेज लाखाणी यांनी अनेक वेळा नागरिकांना पाणी दिले आहे.
लहान चिंचपाडा व लाखाणी पार्कमधील पाण्याची टाकी देखील नादुरुस्त आहे. त्यामुळे लाखाणी पार्कमधील रहिवाशांना पाणीटंचाई जाणवत आहे. पालिका प्रशासनाने नियमित पाच टँकर पाणीपुरवठा दररोज करावा, त्यात मध्येच खंड पडू नये, यासाठी सतर्क राहून लक्ष द्यावे. लहान चिंचपाडा व लाखाणी पार्कमधील पाण्याची टाकी दुरुस्त करून कायम स्वरूपी सोय करावी, अशी मागणी होत आहे. टँकरने पाणीपुरवठा न झाल्यास लाखाणी पार्कमधील संपूर्ण रहिवाशांना आमरण उपोषणाशिवाय पर्याय उरणार नाही, असे निवेदन तहसीलदार मंदार कुलकर्णी व पालिका पाणीपुरवठा अभियंता सचिन अग्रवाल यांना दिले. तहानलेल्या लोकांना पाणी देणे हा सर्वात मोठा धर्म आहे, परंतु पालिका प्रशासन या धर्माला जागेल का, असा प्रश्न उपस्थित केला जात आहे.