कळंबू येथे विहिरीत आढळला तरुणाचा मृतदेह

शुक्रवारी दुपारी एक वाजेच्या सुमारास कळंबू गावालगत असलेल्या पडक्या विहिरीजवळ लहान मुले खेळत असताना त्यांना विहिरीतून दुर्गंधी येऊ लागल्याने त्यांनी विहिरीत डोकावून पाहिले असता मृतदेह आढळून आला. या घटनेची माहिती सारंगखेडा पोलिसांना देण्यात आली. सारंगखेडा पोलीस ठाण्याचे निरीक्षक राजेश शिरसाठ, पो.कॉ. विजय गावित, ठाणसिंग गिरासे यांनी घटनास्थळी भेट देऊन विहिरीतून मृतदेह बाहेर काढला. हा मृतदेह कल्पेश दगडू पाटील (३५) या तरुणाचा असल्याचे निष्पन्न झाले. हा तरुण ५ मे रोजी सायंकाळी चार वाजेपासून घरातून बेपत्ता झाला होता. त्याला दारूचे व्यसन असल्याने याआधीही अधूनमधून बेपत्ता असायचा. मात्र दोन-तीन दिवसांपासून घरी न आल्याने त्याच्या कुटुंबीयांनी शोध घेतला असता तो मिळून आला नव्हता. वडाळी प्राथमिक आरोग्य केंद्राचे वैद्यकीय अधिकारी डॉ. राजन दुगड यांनी घटनास्थळी मृतदेहाचे शवविच्छेदन करून नातेवाइकांच्या ताब्यात देण्यात आला. याबाबत सारंगखेडा पोलीस ठाण्यात नोंद करण्यात आली आहे.