नंदुरबार : तालुक्यातील लहान शहादा गावाजवळ रस्त्यात उभ्या असलेल्या ट्रॅक्टर ट्रालीवर मोटारसायकल धडकून एकाचा मृत्यू झाल्याची घटना सोमवारी मध्यरात्री दरम्यान घडली. याप्रकरणी पोलीसात नियमबाह्य पणे ट्रॅक्टर उभे करणाऱ्या चालकाविरोधात गुन्हा दाखल करण्यात आला आहे.
अरुण नानासाहेब देसले (४३) रा.जोगशेलू ता. शिंदखेडा ह.मु. हेमंत नगर, नंदुरबार असे मयताचे नाव आहे. अरुण देसले हे रात्री जीजे ०६ एमपी ३८०५ या मोटारसायकलीने प्रकाशाकडून नंदुरबारकडे येत होते. दरम्यान लहान शहादे गावातील महामार्गावर एमए९ ३९ व्ही ४८५६ हे ट्रॅक्टर ट्राॅलीसह अत्यंत बेशिस्त पद्धतीने उभे करण्यात आले होते. रस्त्याच्या मधोमध उभ्या असलेल्या ट्रॅक्टरचे इंडिकेटरही बंद असल्याने दुचाकीस्वार अरुण देसले यांना अंदाज न आल्याने त्यांची मोटारसायकल थेट ट्राॅलीवर धडकली होती. यातून अरुण देसले हे गंभीर जखमी झाले होते. त्यांना तातडीने रुग्णालयात उपचारांसाठी दाखल करण्यात आले असता, उपचार सुरु असताना त्यांचा मृत्यू झाला.
याप्रकरणी समाधान भटू पाटील यांनी नंदुरबार तालुका पोलीस ठाण्यात दिलेल्या फिर्यादीवरुन एमएच ३७ व्ही ४८५६ वरील ट्रॅक्टर चालकाविरोधात अपघात घडवून आणल्याप्रकरणी गुन्हा दाखल करण्यात आला आहे. तपास पोलीस उपनिरीक्षक भिंगारदे करत आहेत.