नांदेड : आजकाल एकत्र कुटुंब पद्धती मोडीत निघत आहे. पती-पत्नी आणि मुले-मुली एवढेच सदस्य घरात असावेत, यासाठी अनेकांचा अट्टाहास असतो. त्यामुळे घरात असलेली वृद्ध मंडळी त्यांच्या दृष्टीने एकप्रकारचे ओझेच असते. त्यातून कुटुंबात कुरबुरी वाढतात. पिकलेल्या पानांच्या मानसिक स्थितीचा विचार न करता, त्यांना वेगवेगळ्या प्रकारे वाईट वागणूक देण्यात येते. त्यातून अनेक प्रकरणे ही पोलिसांपर्यंत पोहोचतात.
नांदेड जिल्ह्यात महिला सहाय्य कक्षात असलेल्या वृद्धांसाठीच्या १०९० हेल्पलाईनवर २२ वृद्धांनी तक्रारी नोंदवल्या आहेत. त्यातील सर्वाधिक तक्रारी या सूनेकडून होणाऱ्या त्रासाच्या आहेत तर क्रमांक दोनवर मुलांकडून होणाऱ्या छळाच्या आहेत. सून जेवायला देत नाही, मुलगा औषधपाणी करत नाही, संपत्ती नावावर करुन देण्यासाठी त्रास देतो अशाप्रकारच्या तक्रारी वृद्धांनी केल्या आहेत. दरम्यान, वृद्धांनी तक्रार केल्यानंतर महिला सहाय्य कक्षात दोघांनाही बोलावून घेण्यात येते. याठिकाणी त्यांचे समुपदेशन केले जाते. तसेच गरज पडल्यास वृद्धांना कायदेशीर सल्लाही देण्यात येतो. महिला सहाय्य कक्षाने आजपर्यंत अशाप्रकारे अनेक कुटुंबातील कलहावर तोडगा काढला आहे.
२२ तक्रारींचा केला निपटारा
महिला सहाय्य कक्षात ज्येष्ठ नागरिकांकडून वर्षभरात तब्बल २२ तक्रारी करण्यात आल्या होत्या. या तक्रारीनंतर याठिकाणी तक्रारकर्ता वृद्ध आणि ज्याच्याविरोधात त्यांची तक्रार आहे अशा दोघांनाही बोलावण्यात येते. सुरुवातीला दोन्ही बाजूंचे म्हणणे ऐकून घेण्यात येते, त्यानंतर वृद्धाला त्रास देत असल्याचे स्पष्ट झाल्यानंतर संबंधित मुलाला तसे न करण्याबाबत समज दिली जाते. तसेच कायदेशीर कारवाईची माहितीही दिली जाते. अशाप्रकारे जवळपास २२ तक्रारींचा याठिकाणी निपटारा करण्यात आला आहे. इतर जिल्ह्यांच्या तुलनेत नांदेडमध्ये ज्येष्ठांच्या तक्रारींचे प्रमाण कमीच आहे.