नांदेड: - नांदेडमध्ये गुरुवारी एकाच दिवशी दोन कोरोनाबाधित रुग्णांच्या मृत्यूने खळबळ उडवून दिल्यानंतर शुक्रवार सकाळी तीन जणांना कोरोनाचा संसर्ग झाल्याचे स्पष्ट झाले. हे तिघेही चालक असून पंजाब येथे यात्रेकरूंना सोडून नांदेडला परतले होते.
नांदेड शहरात कोरोनाच्या रुग्णांचे तीन रिपोर्ट पॉझिटीव्ह येण्याची ही पहिलीच वेळ असल्याने शहरात खळबळ उडाली आहे. यापूर्वी नांदेड शहरात २२ एप्रिल रोजी पहिला रुग्ण आढळून आला होता. त्यानंतर दुसरा रुग्ण अबचल नगर येथील ४४ वर्षीय रुग्ण सापडला होता. तर परभणी जिल्हयातील सेलू येथून उपचारास आलेली महिला कोरोनाबाधित आढळली होती. यातील पीरबुर्‍हाणनगर येथे राहणार्‍या व सेलू येथून उपचारासाठी आलेल्या महिलेचा गुरुवारी मृत्यू झाला.
नांदेड येथून पहिल्या टप्यात यात्रेकरूंना घेऊन ट्रॅव्हल्स पंजाबकडे रवाना झाल्या होत्या. यात सतरा चालकांचा समावेश होता. हे चालक पंजाब येथून परतल्यानंतर त्यांना क्वॉरंटाईन करण्यात आले होते. यातील सतरा जणांपैकी तीन ट्रॅव्हल्स चालकांचे अहवाल पॉजिटीव्ह आले असल्याचे प्रशासनाच्या वतीने सांगण्यात आले.