नागपुरात मोकाट म्हशीचा धुमाकूळ; ८० वर्षीय वृद्धाचा मृत्यू, आठ जण गंभीर जखमी

Nagpur News: महालातील गांधी गेट परिसरात सोमवारी सकाळी मोकाट फिरणाऱ्या एका आक्रमक म्हशीने अक्षरशः मृत्यूचा तांडव घातला. या भीषण घटनेत ८० वर्षीय ज्येष्ठ नागरिकाचा मृत्यू झाला, तर आठ हून अधिक नागरिक जखमी झाले.

- योगेश पांडे नागपूर -  महालातील गांधी गेट परिसरात सोमवारी सकाळी मोकाट फिरणाऱ्या एका आक्रमक म्हशीने अक्षरशः मृत्यूचा तांडव घातला. या भीषण घटनेत ८० वर्षीय ज्येष्ठ नागरिकाचा मृत्यू झाला, तर आठ हून अधिक नागरिक जखमी झाले. जखमींमध्ये एका पोलीस कर्मचाऱ्याचादेखील समावेश आहे. अवघ्या काही क्षणांत घडलेल्या या थरारक प्रकारामुळे परिसरात संताप आणि हळहळ व्यक्त करण्यात येत आहे.

लक्ष्मण नारायणराव कुंभारे (८०, कोठी मार्ग, महाल) हे सोमवारी सकाळी नेहमीप्रमाणे घराबाहेर पडले होते. गांधी गेट परिसरातून जात असताना अचानक एक मोकाट म्हैस वेगाने त्यांच्या दिशेने धावत आली आणि क्षणात त्यांना जोरदार धडक दिली. म्हशीच्या या भयंकर धडकेमुळे कुंभारे रस्त्यावर कोसळले. धडकेची तीव्रता इतकी जबरदस्त होती की त्यांच्या डोक्याला व शरीराला गंभीर दुखापत झाली. हा हृदयद्रावक प्रसंग पाहून परिसरातील नागरिक अक्षरशः हादरले. काहीजण मदतीसाठी धावले, मात्र कुंभारे यांना म्हशीच्या तावडीतून वाचवणे शक्य झाले नाही. त्यांना इस्पितळात नेले असता डॉक्टरांनी मृत घोषित केले.

दरम्यान, या घटनेनंतरही म्हैस शांत झाली नाही. उलट ती आणखी बेभान होऊन रस्त्यावरून जाणाऱ्यांवर धावून जाऊ लागली. त्याच वेळी परिसरातून जात असलेल्या दोन दुचाकीस्वारांना देखील तिने जोरदार धडक दिली. या धडकेत दोघेही रस्त्यावर फेकले गेले आणि गंभीर जखमी झाले. स्थानिकांनी तातडीने त्यांना उचलून जवळच्या रुग्णालयात दाखल केले असून त्यांच्यावर उपचार सुरू आहेत. त्यानंतर म्हशीने आणखी सहा लोकांवर हल्ला केला. घटनेची माहिती मिळताच पोलिसांचे पथक तातडीने घटनास्थळी दाखल झाले. मात्र म्हशीला नियंत्रित करण्याच्या प्रयत्नात पोलीस कर्मचारी राहुल चुडे हेदेखील जखमी झाले. त्यानंतर म्हशीने महालातील अंतर्गत भागात धुमाकूळ घातला. बराच वेळ प्रयत्न केल्यानंतर मनपाच्या कर्मचाऱ्यांनी नाग नदी पुलाजवळ त्या आक्रमक म्हशीला पकडून ताब्यात घेतले. मात्र तोपर्यंत एका निरपराध वृद्धाचा जीव गेला होता.

मनपाचे दुर्लक्ष, नागरिकांमध्ये संतापया घटनेनंतर गांधी गेट परिसरात नागरिकांमध्ये प्रचंड संताप व्यक्त केला जात आहे. शहरात मोकाट जनावरांचा वाढता त्रास वारंवार समोर येत असतानाही प्रशासनाने ठोस कारवाई न केल्याचा आरोप स्थानिकांनी केला आहे. आज एका ८० वर्षीय वृद्धाचा जीव गेला, उद्या अजून किती जणांचा बळी जाणार?” असा संतप्त सवाल नागरिकांकडून उपस्थित केला जात आहे.

शांतीनगरची म्हैस महालात ?सूत्रांनी दिलेल्या माहितीनुसार संबंधित म्हैस शांतीनगर परिसरातील एका व्यक्तीची आहे. मात्र कुठल्याही नियमांची पर्वा नसलेल्या म्हैसमालकाकडून तिला बाहेर सोडण्यात येत होते. मनपाच्या पथकांकडूनदेखील लक्ष देण्यात येत नसल्याने हा प्रकार घडला.