ट्रकची दुचाकीला धडक, पतीचा मृत्यू तर पत्नी जखमी

वानाडोंगरी: हिंगणा पोलीस ठाण्याच्या हद्दीत येणाऱ्या आमगाव- देवळी-मोंढा रस्त्यावर ट्रक आणि दुचाकी अपघातात एकाचा मृत्यू झाला तर एक महिला गंभीर जखमी झाली. दुपारी ४ वाजताच्या सुमारास ही घटना घडली. आमगावकडून येणाऱ्या दुचाकी क्रमांक एम.एच.४०/ बी.पी.- ५३२५ ला मोंढा मार्गे येणाऱ्या आयशर ट्रक क्रमांक एम.एच./०४ सी.यू. १०४२ च्या चालकाने जबर धडक दिली. यात धडकेत दुचाकीवरील महिला शारदा रविशंकर कुचनकर (५४) या ट्रकच्या समोरील काचावर फेकल्या गेल्या तर रविशंकर मारोतराव कुचनकर (५८) हे ट्रकखाली दुचाकी सहित ओढल्या गेले. घटनेची माहिती मिळताच पोलीस निरीक्षक सपना क्षीरसागर यांच्या मार्गदर्शनात सहायक पोलीस निरीक्षक जीवन भातकुले ताफ्यासह घटनास्थळी दाखल झाले. पोलिसांनी जखमी पती-पत्नीला हिंगणा येथील ग्रामीण रुग्णालयात तातडीने हलविले. तपासणीदरम्यान डॉक्टरांनी रविशंकर यांना मृत घोषित केले. शारदा यांना नागपूर येथील मेडिकल येथे पुढील उपचारासाठी रवाना करण्यात आले. पोलिसांनी ट्रक चालकविरुद्ध गुन्हा दाखल केला आहे. अपघातील दोन्ही वाहने पोलीस ठाण्यात जमा केली तर ट्रक चालक पळून गेल्याने त्याला अद्याप अटक करण्यात आली नाही.